Ifipusho Ukufuma ku Babelenga
◼ Yohane 18:15 ilumbulula umusambi uwaishibikwa kuli shimapepo mukalamba. Bushe uyu e musambi umo wine uyo mu kubangilila wafulumwike “ubwamba,” nga fintu cacitwa lipoti pali Marko 14:51, 52?
Iyo, cilemoneka ukuti umuntu waishibikwe kuli shimapepo mukalamba aali mutumwa Yohane, ilintu cali musambi Marko uwafulumwike “ubwamba.”
Ukubika ubu bulondoloshi bwalembwa mu kutantika kwa nshita, tuletendekela pe bala lya Getsemane. Abatumwa bayankwileko mu mwenso lintu Kristu aiketwe. “Bafulumwike bonse.” Icikomo cimo cine ica bulondoloshi bwalembwa ubwa kwa Marko cileta ukucilanya: “Awe umulumendo umo uwakupene fye insalu ya kolokondwe ku mubili, alimukonkele; kabili abantu balimwikete, lelo ashile insalu ya kolokondwe, afulumwike ubwamba.”—Marko 14:50-52.
Muli ifyo, ukwankulako kwa kutendekelako ukwa batumwa 11 kwacilana no ko ukwa uyu musambi ushalumbulwe shina, e co cilimo amano ukusondwelela ukuti tali umo uwa batumwa. Ici ca kucitika calembwa fye mwi Landwe ilyalembelwe no musambi wa mu kubangilila Yohane Marko, umufyala wa kwa Barnaba. E ico, kuliko mulandu wa kusuminina ukuti Marko ali “umulumendo umo” uwatendeke ukukonka Yesu waikatwa lelo uwafulumwike ukwabula umwingila wakwe lintu impuka yaeseshe ukumwikata na o wine.—Imilimo 4:36; 12:12, 25; Abena Kolose 4:10.
Pa nshita imo ilya nshita ya bushiku, umutumwa Petro na o akonkele Yesu, pa ntamfu yabulamo busanso. Muli uyu mulandu palipo ukupalana; umusambi wacaice (Marko) atendeke ukukonka Yesu lelo aliminine, ilintu pa numa babili aba mu batumwa abo bafulumwike batendeke ukukonka Intungulushi yabo iyaiketwe. Mwi Landwe lya mutumwa Yohane, tubelenga ukuti: “Awe Simone Petro alakonka Yesu, no musambi umbi. Kabili ulya musambi aishibikwe kuli shimapepo mukalamba, kabili aingilile pamo na Yesu mu lubansa lwa kwa shimapepo mukalamba.”—Yohane 18:15.
Umutumwa Yohane abomfya ishina “Yohane” mu kulosha kuli Yohane Kabatisha lelo talosha ku mwine mwi shina. Ku ca kumwenako, alemba ulwa “musambi e uleshimiko bunte bwa fintu ifi, kabili e wafilembele.” Mu kupalako: “Uwamwene nashimiko bunte, kabili ubunte bwakwe bwa cine cine; kabili ulya aishibo kuti asose ca cine cine.” (Yohane 19:35; 21:24) Moneni na kabili Yohane 13:23: “E po ali umo pa basambi bakwe, uyo Yesu atemwa, nakuwamina pa cifuba ca kwa Yesu.” Ico cali mu kwipipa pa ntanshi ya kwikatwa kwa kwa Yesu. Pa numa bulya bwine bushiku Yesu wapopelwe asobwele umusambi umo, uyo Yohane alumbula mu numbwilo shapalako ukuti: “Pa kumona nyina no musambi uo atemenwe nabeminina, [Yesu] atile kuli nyina, Mukwai, mono mwana obe!”—Yohane 19:26, 27; linganyeniko Yohane 21:7, 20.
Iyi mibele imo ine iya kukanailumbula umwine imoneka pali Yohane 18:15. Mu kulundapo, Yohane na Petro basuntinkanishiwa mu bulondoloshi bwalembwa ubwa pa numa ya kubuushiwa pali Yohane 20:2-8. Uku kulangilila kutubululo kuti umutumwa Yohane aali “ulya musambi [uyo] aishibikwe kuli shimapepo mukalamba.” Baibolo taipayanya ifyebo fya cikulilo ukufuma ku fintu umutumwa [Yohane] umwina Galili pambi aishileishiba, no kwishibikwa kuli, shimapepo mukalamba. Lelo ukwishibikwa kwakwe ku ba ŋanda ya kwa shimapepo mukalamba kwalengele Yohane ukupita pa mulinshi ukuya mu lubansa no kwingisha Petro na o.