Ukukakulwa kwa fya Kulekelesha Ifya Fimfungwa Fya Muli Bemba Wafwa

SEPTEMBER wapwa, icimulando capindama ica fya kusambilila ico caisalilwe pa makumi ya myaka mu kupelako calicilukwilwe. Ukupaashanya kwabipisha pa kati ka basambi ba Fimfungwa fya muli Bemba Wafwa kwamoneke ukupwa, nangu cingati ukupaashanya kupya pambi kwalitendeke.

Ifimfungwa fya muli Bemba Wafwa fyalisangilwe mu ncengo mupepi na Bemba Wafwa mu 1947 na mu myaka yakonkelepo. Fyali ifya mutengo ukalamba mu kulangilila ukulungika kwacindama ukwa calembwa ca Malembo ya ciHebere na mu kusanikila pa mibele ya butotelo mu Palestine lintu Yesu aali pe sonde. (Esaya 40:8) Ilintu bamanyuskripiti bambi basabankanishiwe mu kwangufyanyako, mu 1991 mupepi na bamanyuskripiti 400 baali bacili tabalasabankanishiwa no kukanabako ku basambilila abafulilako. Abengi bayumfwile nga Profesa Ben Zion Wacholder, “uwakalifiwa pa kumfwikisha ukuti pa cipimo ca kusabankanya ica ndakai bonse tukaba natufwa lintu ifyalembwa fyakumanina ifya fyalembwa fya muli Bemba Wafwa fyabako ku calo.”

Lelo iyo mibele yalyalwike September wapwa. Ica kubalilapo, Profesa Wacholder no munankwe, Martin Abegg, abilishe ukuti babomfeshe kompyuta no kuletako cipya cipya ifyalembwa fyatungululwa mu kupalamisha. Lyene, Laibrari ya Huntington mu San Marino, California, U.S.A., yabilishe kuti balikwete ifikope fya bamanyuskripiti ba kutendekelako kabili baali no kupayanya ifi ku basambilila abacindikwa ukwabula ukukaanya ukuli konse. Mu kumonekesha, impendwa ya makope yakopwa aya fimfungwa yalipangilwe ku kushininkisha ukubakwa kwa yako. Ifipo fya fikope fyalisungilwe mu fifulo fyalekanalekana, na mu kupelako cimo caishileba mu Laibrari ya Huntington.

Uwasambilila umo aitile uku kwaluka kwa fya kuponako ‘icalinganako ca mu fya kusambilila ica kuwisha Icibumba ca Berlin.’ Bakalemba ba malyashi aba bulashi baitile fyonse fibili icitabo ca calembwa ca pali kompyuta no kukakulwa kwa fikope nga ‘ubupuupu.’ Mu kupalako, ukupaashanya pa lwa fishinte fya mibele isuma kukatwalilila pa myaka. Pali ino nshita, cimoneka ukuti abasambilila abengi abalundwapo bakaba na maka ya kulanshanya ne bumba lyonse ilya Fimfungwa fya muli Bemba Wafwa.

[Icikope pe bula 32]

Ukwimininwako kwa kulandapo pali Habakuki, cimo ica Fimfungwa fya muli Bemba Wafwa