Ukulambulwa ne “Cilongwe ca Mweo”

KULI malaika wa ku cilonganino mu Smurna, umutumwa Yohane aebelwe ukulemba ati: “Ube uwa cishinka ukufika ku mfwa, na ine nkakupeele cilongwe ca mweo.” (Ukusokolola 2:8, 10) Muli ifyo, ica bulanda kabili ica kulengo buseko cili kubilisha kulecitwa pano ukwa kuti Frederick William Franz, presidenti wa Watch Tower Bible and Tract Society of Pennsylvania na Watchtower Bible and Tract Society of New York, Inc., pamo pene ne mpendwa ya tubungwe tumbi utwa teokratiki, apwishishe umulimo wakwe uwa pe sonde pa lucelo lwa December 22, 1992.

Cili kubilisha kwa bulanda mu kuti kuletweba ulwa kufuma pa mulola we sonde ukwa mubomfi wa kwa Yehova uwatemwikwa apakalamba kabili uwa busumino bwapulamo. Nalyo line, cili kubilisha kwa kulengo buseko pantu kuli munyinefwe watemwikwa Franz nomba kulebomba amashiwi ya pa Ukusokolola 14:13 ayatila: “[Ba nsansa, NW] abafwa abafwila muli Shikulu ukufuma kuli nomba. Umupashi wati, Ifyo fine, pa kuti batushe ku kucucutika kwabo; pantu imilimo yabo ilebakonka.” Munyina Franz aali uwatekanya kabili uwaicefya, umutumikishi uubombesha kabili uusandulula uo Yehova Lesa abomfeshe mu bulamba nge cilundwa ca “musha wa cishinka kabili uwashilimuka” ku kwafwilisha mu kupayanya ica kulya ca ku mupashi ku “ba mu ŋanda” na banabo.—Mateo 24:45-47.

Munyina Franz afyelwe pa September 12, 1893, mu Covington, Kentucky. Akumene ne cine ukupitila muli ndume inankwe umukalamba. Pali iyo nshita alesangwa ku Universiti ya Cincinnati, ukupekanishisha ukwisaba minista wa Presbyterian. Mu cifulo ca ico, aliipaatwile ukufuma kwi Calici lya Presbyterian no kutendeka ukubishanya na Basambi ba Baibolo, nga fintu Inte sha kwa Yehova baleitwa ilyo. Abatishiwe pa November 30, 1913, kabili umwaka wakonkelepo ashiile universiti no kwingila mu mulimo wa bukolopota (painiya). Pa June 1, 1920, abele icilundwa ca lupwa lwa Bethel ya pa Brooklyn. Mu kwangufyanya, alaashikwe ukwangalila idesiki lya ba kolopota, kabili mu 1926 atwelwe kuli dipartimenti wa kulemba, uko abombele mu kucilapo ukupambana. Mu 1945 abele inkonkani ya kwa presidenti wa Watch Tower Society no tubungwe tumbi utwayampanako. Ukukonka pa mfwa ya wali pali iyo nshita presidenti Nathan H. Knorr mu 1977, abele presidenti wa Watch Tower Society. Abombele muli ico cifulo ukufikila imfwa yakwe. Mu nshita ya bumi bwakwe, Munyina Franz amwene impendwa ya Nte sha kwa Yehova ukwingilishiwako ukufuma ku makana yanono ukufika ku mamilioni yane na citika. Aipakishe amashuko ya mulimo ayengi, ukusanshako ukulanda pa mabungano ya pa kati ka nko no kutandalila imisambo na mayanda ya bamishonari mu mbali ishingi isha calo. Ilyashi lyakwe ilya bumi lyamoneke mu Ulupungu lwa kwa Kalinda ulwafumine ulwa May 1, 1987.

Pali Cimo icungulo bushiku, December 28, 1992, ukulongana kwa kwibukisha kwalicitilwe mu Ŋanda ya Bufumu iya pa Bethel ya pa Brooklyn. Ilyashi lyakaba kabili ilya kukuulilila lwa ku mupashi lyalipeelwe kuli Munyina Albert D. Schroeder uwe Bumba Litungulula. Indupwa sha Bethel pa Watchtower Farms, Patterson, Mountain Farm, na Kingdom Farm, pamo pene no lupwa lwa Bethel pa musambo wa Canada shalisuntinkanishiwe ku nsale sha lamya.

Bonse fye, bakalafuluka Munyina Franz, ukucilisha abo babombele nankwe mu kupalamisha. Aali uulangulukilako, uwa kukoselesha, kabili uwatekanya ukulola kuli abo bonse abombele nabo no kwenda nabo. Mu cine cine, abasumina banankwe bayankwile kuli wene mu mupashi wa pa AbaHebere 13:7 apatila: “Ibukisheni intungulushi shenu, ishalandile kuli imwe icebo ca kwa Lesa; tontonkanyeni umwaile imibele yabo, no kupashanye citetekelo cabo.”

Pa December 30, 1992, Munyina Milton G. Henschel alisalilwe nga presidenti wa Sosaite uwalenga busano, ku kupyana Munyina Franz.

[Ifikope pe bula 31]

Frederick W. Franz mu 1913

Pa fakitare ya Sosaite iya pa Myrtle Avenue mu 1920

Na Nathan H. Knorr pa Yankee Stadium mu 1953