Ukusokota Ifyuma Fyashikama

MU 1848 golde yalisangilwe pa cifulo ca kupalilapo imbao ica pa Sutter mu California, U.S.A. Ukufika mu 1849 amakana balekonkomokela ku ncende ukusubila ukusanguka abakankaala mu kwangufyanya, na kabili ukubutukila golde kwakulisha mu lyashi lya kale ilya United States kwalecitika. Pa numa ya mwaka umo, icabu capalamisha, San Francisco, calikulile ukufuma ku kalitauni kanono ukufika ku musumba uwa bantu 25,000. Icilolelo ca cuma ca mu kampampa cashininkishe ukuba ica kubeleleka kwa maka.

Imfumu Solomone uwa Israele wa ku kale alishibe fintu abaume bemba icuma cashikama mu bulamba, kabili aloseshe kuli ici lintu alembele ukuti: “Nga walilila ku kwiluka, wasanswile shiwi lyobe ku mucetekanya, nga wafisokota nga silfere, no kufifwimfwinta nge fyuma ifyashikama; e lyo uleiluka akatiina ka kuli Yehova, no kwishiba Lesa ukakusanga.”—Amapinda 2:3-5.

Kuti wacita ifintu ifingi mu kuba na golde na silfere, lelo kuti wacita ifyafulilako mu kuba no kwishiba no mucetekanya. Ifi fikakwaafwa ukucita ukupingulapo kwalungama, ukupikulule mpika, ukutunguluka mu cupo, no kusange nsansa. (Amapinda 2:11, 12) Mu kupalako, ukwishiba kwa cine na mano fikakwaafwa ukwishiba Kabumba obe, ukumfwikisha imifwaile yakwe, no kumumfwila no kumusekesha. Golde te kuti ikupeele icili conse ica ifi fintu.

Amashiwi ya Baibolo ya cine aya kuti: “Amano cintelelwe nga fintu indalama shaba cintelelwe, lelo ubusuma bwa kwishiba ni ubu: ukuti amano yabaka ubumi bwa uyakwete.” (Lukala Milandu 7:12, New International Version) Ilintu abengi baloota ulwa fyuma fya mu kupumikisha, fintu cacilapo amano ukukupukula Baibolo no kushulamo mucetekanya, ukumfwikisha, ukwishiba, na mano ifyaba icuma ca cine.