Ishina lya kwa Lesa

“Nga Yehova takuulile ŋanda, ninshi abakuulako bacucutika apa fye.” E fibelengwa ifi filembo fya ciLatin. Amashiwi yashimpwa pe Ilumbo 127:1 muli Baibolo, kabili yakwatamo icine cashika ica kuti: Ukutukuta ukuli konse uko kushikwete ipaalo lya kwa Yehova mu kupelako kukabo kwa fye.

Ifilembo, ifya mu mwaka wa 1780, fisangwa pa cikuulwa mu Colombo, Sri Lanka, kabili filelandwapo pa mulandu wa kuti fikwetemo ishina lya kwa Lesa, Yehova. (Mona icikope.) Mu myanda ya myaka iya mu kubangilila ilyo ishina lyalibomfiwe mu kusaalala. Ilingi line lyalembelwe pa fikuulwa fya ku calo, amacalici, nelyo fye pa makobili. Bamishonari babomfeshe ishina lya kwa Lesa lintu batwele Baibolo ku fyalo fya kutali, ukwabula ukutwishika icilondolola ukwafumine ifi filembo mu Sri Lanka.

Ifyo ifintu fyaba ifyapusanako ilelo! Bena Kristu banono fye abaitunga e basakamana pa lwe shina lya kwa Lesa. Abasambilila bamo balengulula fye ne Nte sha kwa Yehova pa kukomaila pali lyene. Mulandu nshi? Ukulingana na bamo, pa mulandu wa kuti imishimbwilwe ya liko iya ciHebere tayaishibikwa bwino bwino. Lelo ni banga baishiba imishimbwile ya kutendekelako iya ciHebere iye shina lya kwa Yesu? Nalyo line, ishina lyakwe lilabomfiwa mu kusaalala kabili lyalicindikwa.

Kuli Yesu, ishina lya kwa Lesa lyali ilyacindama nga nshi. Atusambilishe ukupepa atuti: “Ishina lyenu libelwe akatiina.” (Mateo 6:9) Kabili pa ntanshi fye ya mfwa yakwe, atile kuli Lesa: “Nalange shina lyenu ku bantu abo mwampeelepo aba pano isonde.” (Yohane 17:6) Abena Kristu ba cine bakonshi bakonka mu nkasa sha kwa Yesu. Bushe na bo bene tabalingile ‘ukulange shina lya kwa Lesa’? Inte sha kwa Yehova balacite co, kabili Yehova alapaale “ŋanda” yabo mu kufumba. Kuli bene ilumbo lya cine ilya kuti: “Balishuka [“ba nsansa,” NW] abantu abo Yehova e Lesa wabo.”—Ilumbo 144:15.