Ukusefya Inshiku sha Kufyalwa Kwalisha Ikuba lya Mfwa
UKUSEFYA kwa nshiku sha kufyalwa kumonwa ku bantu abengi ilelo pamo fye ngo mwata wa kaele. Lelo Baibolo taipeele cikope cawama ica ici cishilano. Ica kubalilapo, Amalembo tayakwatamo ukulangilila ukuli konse ukwa kuti uuli onse uwa babomfi ba kwa Lesa aba citetekelo alisefeshe inshiku sha kufyalwa.
Inshiku sha kufyalwa shibili fye shintu Baibolo ilumbula shali sha bakateka abaali balwani ba kwa Lesa. Ukusefya kumo na kumo kwasanshishemo ukuputunkanya, pa kuti abatandashi bengaipakisho kumona imfwa ya umo uwafulwishishe imfumu. Mu ca kucitika ca kubalilapo, Farao, imfumu ya Egupti, aputunkenye mushika wakwe uwa bakafumbika. (Ukutendeka 40:2, 3, 20, 22) Kateka wa bena Egupti acitile fyo mu kati ka mutebeto pa mulandu wa kuti alikalipe pa mubomfi wakwe. Mu ca kucitika calenga bubili, Herode, kateka wa bucisenene uwa Galili, aputwile Yohane Kabatisha umutwe pamo ngo bubile ku mukashana uwo ukucinda kwakwe pa mutebeto kwatemwine wene. We fya kumoneka fya makankamike!—Mateo 14:6-11.
Lelo bushe Baibolo tayatonta fye pa nshiku sha kufyalwa shibili ishaibela nga nshi? Kwena te ifyo. Kalemba wa lyashi lya pa kale uwa ciYuda Josephus asokolola ukuti ifi fya kucitika tafyali ifyaibela. Alilemba utushita na tumbi utwa kubelesha kwa kuputunkanya kwa pa nshiku sha kufyalwa ku kusekeleshiwa.
Ku ca kumwenako, kumo kwacitike pa numa ya bonaushi bwa Yerusalemu mu 70 C.E., lintu abaYuda 1,000,000 balobele na 97,000 bapusunswike ku kusendwa abafungwa. Mu nshila pa kuya ku Roma, mushika mukalamba uwa ciRoma Titus atwele bankole bakwe aba ciYuda ku cabu cali lwa mupepi ica Kaisarea.
Josephus alemba ati: “Ilintu Titus aali pa Kaisarea, asefeshe ubushiku bwa kufyalwa ubwa kwa Domitian munyina mu kuba no bukata bukalamba, ukwipaya ukucila pa bafungwa 2,500 mu fyangalo fya fiswango no lubingu. Pa numa ya ici aseleele ku Berytus [Beirut], umusumba waletekwa na Roma mu Phoenicia, uko asefeshe ubushiku bwa kufyalwa kwa kwa wishi pa kwipaya bankole na bambi abengi pa bulangisho bwapikana.”—The Jewish War, VII, 37, icapilibwilwe na Paul L. Maier muli Josephus: The Essential Writings.
Tacili ca kupapa ukuti The Imperial Bible-Dictionary ilandapo kuti: “AbaHebere ba pa numa bamwene ukusefya kwa nshiku sha kufyalwa pamo ngo lubali lwa kupepa ifilubi, imimwene iyo ilingi yakoshiwe ku cintu bamwene mu fya kusefya fya munsaunte ifyayampene ne shi nshiku.”
Abena Kristu ba citetekelo aba mu mwanda wa myaka uwa kubalilapo mu kushininkisha tabayumfwile ukwangukililwa ukuilunda ku mwata uwalangwa mu kubipishe fyo muli Baibolo kabili uwalesefiwa ifyo mu kukaluka ku bena Roma. Ilelo, Abena Kristu bafumaluka balishiba ukuti ubulondoloshi bwa Baibolo pa lwa nshiku sha kufyalwa bwali pa kati ka fintu ifyalembelwe ku kufundwa kwabo. (Abena Roma 15:4) Balasengauka ukusefya inshiku sha kufyalwa pantu ukusefya kwa musango yo kubika ubucindami bushalinga pa muntu. Icacilapo kucindama, ababomfi ba kwa Yehova mu kubamo amano balalanguluka ukushimikwa kushasenaminwa ukwa nshiku sha kufyalwa ukwa mu Baibolo.
[Icikope pe bula 25]
Icibansa pa Kaisarea