“Imishila Iishingatelentenshiwa”

PA KATI ka fintu fya mweo ifyakulisha mu calo conse kabili ifyakokwesha paba ifimuti fya sequoia ifya ku California. Ifi fya kusungusha fyalulubala ifyalepa ukufika pali bamita 90 kabili kuti fyaikala ukucila pa myaka 3,000.

Nangula ca kuti ukumoneka kwa sequoia kwaliba ukwa kupuutamo umwenso, imishila ya ciko iishimoneka yaliba iya kucebusha. Sequoia akwata ubushishi bwapikulwa ubwingafimba incende iikalamba ukufika kuli bahekita 1.2 ukufika kuli 1.6. Iyi mishila yasaalala ipayanya ica kwikasha cakosa lintu kwaisa mulamba nelyo icikuuku. Sequoia kuti ashipikisha fye ne cinkunkuma ca maka!

Imfumu Solomone asalilepo imishila yakosa iya cimuti nga mampalanya muli limo ilya mapinda yakwe. “Takwaba umuntunse uwingaipampamika ku bubifi,” e fintu asosele, “lelo abantu basuma bakwata imishila iishingatelentenshiwa.” (Amapinda 12:3, The New English Bible) Ee, ababifi tabakatwalilile abashangila. Ukutunguluka ukuli konse uko bengamoneka ukukwata kwa pa kashita kanono fye, pantu Yehova alaya ukuti “icilolela ababifi cikaloba.”—Amapinda 10:28.

Uku kuli kusoka kuli abo abaitunga ukuba Abena Kristu, pantu Yesu atile bamo baali no kuba ‘ababula umushila’ muli bene kabili baali no kuipununa. (Mateo 13:21) Mu kulundapo, umutumwa Paulo alembele pa lwa bantu abo baali no ‘kusensenunwa kabili abapepelulwa ku mwela onse we sambilisho [lya bufi].’ (Abena Efese 4:14) Ni shani fintu ici cingacilikilwa?

Kwati fye fintu imishila ya sequoia yandatila mu kusaalala mu mushili wa kumesha uwe sonde, e fyo ne mintontonkanya yesu ne mitima ilingile ukusapika mu kusaalala mu Cebo ca kwa Lesa no kunwa amenshi ya ciko ayapeelo bumi. Ici cikatwaafwa ukulundulula icitetekelo cashikama mu kukosa. Kwena, tukalaumfwa ukusonga kwa fya kwesha fyaba na mabimbi. Napamo kuti twapungaila fye no kupungaila, ukupala icimuti, mu kubapo kwa kayofi. Lelo nga ca kuti icitetekelo cesu calishikama bwino, tukashininkisha ukukwata “imishila iishingatelentenshiwa.”—Linganyako AbaHebere 6:19.