Amaka ya Cebo Cabamo Icikuuku

“Umutima wafinininwa na masakamika, fintu icebo cabamo icikuuku cingapembesula wene!”—Amapinda 12:25, Knox.

ABENA KRISTU tabatunwa ku mpika. Pa nshita shimo balakumanya amasakamika pa mulandu wa kwikala muli ishi “nshita ishayafya.”—2 Timote 3:1.

Lintu ulecula ukumanama kwa musango yo, fintu ciba lipaalo ukumfwa ifyebo fyabamo icikuuku ukufuma kuli cibusa wa bucishinka! “Icibusa citemwa mu nshita yonse, kabili munyina afyalilwo kumanama,” e fisosa Baibolo. (Amapinda 17:17) Umuntu wa busumino Yobo aishibikilwe ku kuba uyu musango wa cibusa. Nelyo fye ni Elifasi asosele ulwa wene ukuti: “Lintu umo aipunwine, ukunakuka no kufunshika, ifyebo fyobe fyalimukoseleshe ukutalila.”—Yobo 4:4, Today’s English Version.

Nangu cibe fyo, lintu Yobo umwine wine akabile ukukoselesha, Elifasi ne fibusa fyakwe tabafumishe amashiwi ya cikuuku. Bapeele Yobo umulandu pa kucula kwakwe, ukutubulula ukuti afwile alikwete ifilubo fya mu bumfisolo. (Yobo 4:8) The Interpreter’s Bible ilandapo kuti: “Cintu Yobo alekabila cili cililishi ca mutima wa buntunse. Cintu alepokelela cili kukonkana kwa milandile ya ‘cine’ umupwilapo kabili imilandile yabamo kuyemfya iya fya butotelo iyabwekeshiwabwekeshiwapo kabili iya kutendusha umupwilapo.” Yobo aali uwakalifiwa icibi pa kumfwa imilandile ya kwa Elifasi ne fibusa fyakwe ica kuti aliseshiwe ukukuuta ukuti: “Mukafisha lilali pa kulengo mutima wandi ubulanda, no kumfwanta ku fyebo?”—Yobo 19:2.

Tatulingile ukwesha ukulenga umubomfi munensu uwa kwa Lesa ukukuuta mu kumanama pa mulandu wa milandile yesu iyabulo kutontonkanya, iya fyebo fyabulamo icikuuku. (Linganyako Amalango 24:15.) Ipinda lya Baibolo lisoko kuti: “Cintu usosa kuti cabakilila ubumi nelyo ukubonaula; e co ufwile ukupokelela ifya kufumamo fya fyebo fyobe.”—Amapinda 18:21, TEV.

Ukwishiba amaka ya milandile, lekeni tukonke ica kumwenako ca mutumwa Paulo. Ilintu aali mu Makedonia, ‘alekonkomesha abantu ku fyebo ifingi.’—Imilimo 20:2.