Mulandu Nshi Ababifi Babela no Busambashi?

“NGA kanshi cinshi ico ababifi bengabela no mweo?” Ici cipusho caipushiwe akale sana na Yobo wa busumino, kabili calibwekeshiwabwekeshiwapo imiku iingi ukutula mu kasuba kakwe. Mu kupalishako caliba mu mintontonkanya ya bantu abengi mu fifulo fya yali kale Yugoslavia (pamo ngo yu mwanakashi alangilwe pa nkupo yesu) abaloosha abo abacula mu nkondo ya kulengo bulanda. Mulandu nshi ababifi bapusunsukila no kutwalilila fye ukusambala? Nga fintu Yobo alandile, ilingi line “amayanda yabo yabo mutende yabulwamo umwenso; ne nkonto ya kwa Lesa tayaba pali bene.”—Yobo 21:7, 9.

Bushe ici cipilibula ukuti tamwabako ubucindami mu kubombela Lesa, ukutemwa umwina mupalamano wa umo, no kutaluka ku kucita icalubana? Napacepa! Baibolo itupeela imimwene yalungama lintu itila: “Witukuta ukucimfya ababifi nelyo ukupashanya abacita ifyalubana. Apantu ukupala icani balabonsa mu kwangufyanya, kabili balalokota ukupala umulemfwe uuteku uwa muli shinde. Tetekela SHIKULU no kucite cisuma.”—Ilumbo 37:1-3, The New English Bible.

Ee, icimoneka ukuba ubusambashi bwa babifi ca pa kashita fye akanono. Na kuba, ubumi bwabo bwaliba ubwaipipa nga nshi, ilintu abo ababombela Lesa balikwata isubilo lya bukata ilya nshita ya ku ntanshi. Mu kwangufyanya, ubulayo bwa kwa Lesa bukafikilishiwa ubwa kuti: “[Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” (Ukusokolola 21:4) Bantu balungama epela, te babifi, e bakamonako ifyo fya kuponako. Mwandi kukoselesha kwa kupalamina kuli Lesa no kusambilila ukucita ukufwaya kwakwe, te mulandu na fintu abo batushingulwike bengaba ababifi!

Nga mwingatemwa ukupokelela ifyebo fyalundwapo nelyo nga kuti mwatemwa ukukwata umuntu umo ukumutandalila ku kutungulula isambililo lya Baibolo ilya pa fye ilya mu ŋanda na imwe, twapaapaata lembeleni ku Watch Tower, Box 33459, Lusaka 10101, nelyo kuli adresi yalinga pa yatantikwe pe bula 2.