“Ukushitisha Umucele” mu Mozambique
FRANCISCO COANA, icilundwa ca komiti angalila umulimo wa kushimikila mu Mozambique, apoosele imyaka ikumi mu nkambi sha kucushiwilwamo. Ashimika ica kukumanya cakwe ukuti: “Nalishibe ukuti twali no kuba kuno pa nshita ntali, e co naipwishe kangalila wa muputule nga kuti natwalilila ukubomba nga painiya wa nshita yonse. Lelo ni shani fintu nali no kuba na maka ya kupeelesha inshita yakumanina ku butumikishi bwa ku cintubwingi, apantu mupepi no uli onse uwali mu nkambi aali ni umo uwa Nte sha kwa Yehova? Napelulwile ukuti nali no kuya ku Milange, itauni lyatalukako amakilomita 47, ku kusanga abantu ba kushimikilako.
“Nangu cingati tatwasuminishiwe mwi funde ukufuma mu nkambi, ili funde talyakosele sana. Ndeibukisha ukuya mu mpaanga, ukufukama pa nshi, ukupepa ukuti ningasangako inshila ya kushimikilamo abantu ba cikaya. Mu kwangufyanya Yehova alyaswike.
“Nakumene no mwaume wakwete incinga, no kulanshanya nankwe pa lwa ncinga yakwe. Alisumine ukuti nga ca kuti namulimine ibala lyakwe ilya maheka yabili ilyo amainsa yali tayalaisa, aali no kunambula incinga yakwe nga malipilo. E co cila lucelo naleya mu kumulimina ibala. Yehova alipaalile iyi mitantikile, apantu mu kupelako nalikwete incinga.
“Ica kufumamo cali ca kuti nali na maka ya kuya kwi tauni lya Milange no kutwalilila bupainiya bwandi mu kufumamo cimo muli ili bala lisanduluka. Apantu umulimo wesu walibindilwe, nali no kusangako inshila ya kwebelamo abantu pa lwa cine. Pa numa ya kulonga ifitabo na bamagazini mwi shati lyandi, nasendele umucele mu cola no kuya ndeshitisha umucele. Mu cifulo ca kushitisha wene pali 5 meticais, naleshitisha pali 15 meticais. (Nga ca kuti umutengo wali no kunaka sana, abantu baali no kuushita onse, kabili nshali na kukwata umucele uuli onse uwa kubomfya mu kushimikila!) Ukulanshanya kwandi kwalecitwa mu nshila yapale yi:
“‘Mwabombeni mukwai! Ilelo ndeshitisha umucele.’
“‘Shinga?’
“‘Amameticais 15.’
“‘Iye aba. Uyo mutengo wakula nga nshi!’
“‘Ee, ndesuminisha ukuti umutengo naukula. Lelo nga mulemona ukuti naukula pali nomba, loleleniko fye panono pantu uli no kucilapo bukulu ku nshita ya ku ntanshi. Bushe namwishiba ukuti ici calisobelwe muli Baibolo?’
“‘Nshabala mbelengapo ico muli Baibolo wandi.’
“‘Ala, e mo caba. Leteni Baibolo wenu, nalamulanga.’
“Mu kuba ne co ukulanshanya kwali no kukonkapo ukubomfya Baibolo wakwe, e co uwandi ena aali no kutwalilila ukuba mwi shati lyandi. Nalelosha ku Ukusokolola icipandwa 6, ukukuma ku mibele yayafya no kucepelwa kwa fya kulya. Nga ca kuti namona ukuti aleankulako bwino, nalefumya Icine Icitungulula ku Bumi bwa Ciyayaya nelyo Imbila Nsuma Iya Kukulenga uwa Nsansa no kutendeka isambililo lya Baibolo ilyalondoloka.
“Ica kufumamo cali ca kuti nalikwete ibumba lya basekelela 15 mu Milange. Lelo tapalepele pa ntanshi aba mu bulashi baishileishiba pa lwa mibombele yesu. Bushiku bumo lintu naletungulula isambililo lya Baibolo, bakapokola baishileingila mu kupumikisha no kutwikata. Ifwe bonse, ukusanshako abana banono aba ulo lupwa, twasendelwe ku cifungo ca cikaya. Pa numa ya kupwisha umweshi umo mulya, ifwe bonse twatwelwe ku nkambi na kabili.”
Ifi fya kukumanya tafyashinshibike ukupimpa kwa bamunyinefwe. Mu kupusanako, Francisco no lupwa lwakwe, capamo na makana ya bamunyinabo abali muli shilya nkambi, nomba balepepa no kushimikila mu buntungwa mu Mozambique.