Indalama sha Museke Ishalembwapo Ishina lya kwa Lesa

LOLESHA mu kusakamanisha pa makobili yalangililwe pano. Yapangilwe ne mfumu ya mu Germany Wilhelm V mu nshita ya kuteka kwakwe ukutula mu 1627 ukufika mu 1637. Pali iyo nshita, iciputulwa cikalamba ica Europe cafyambetwe mu Nkondo ya Myaka Amakumi Yatatu, ukushomboka pa kati ka baKatolika na baProtestanti. Wilhelm V aali ku lubali lwe bumba lya baProtestanti. Ku kupayanishisha ifipooswa fikalamba ifya uku kukansana, abuulile silfere wakwe onse no kupangamo indalama sha museke.

Ku ca kusekesha, ifishibilo pa ndalama sha museke ishingi filangilila akasuba ukushinguluka ishina lya kwa Lesa, Yehova, mu musango wa Tetragramatoni wa ciHebere. Na kabili paliba ne cimuti ca ngashi, icilangilila ubukose. Ukutubulula kuli kwa kuti icimuti, nangu cingati cilongama ku mwela, te kuti cikontoke pe samba lya kucingilila kwa kwa Lesa. Ifilembo fya ciLatini pa ndalama ya museke fyakwata ishina Yehova kabili filangilila ukucetekela mu maka yakwe aya kucingilila.

Mu cifulo ca kuletako ukucingililwa kwa kwa Lesa, ukubomfya kwa musango yo ukwe shina lya kwa Lesa kwali mu cine cine ukwa fye, apantu Yehova tabisha ulubali lumo mu kukansana kwa mutundu wa muntu. Mu cituntulu, Inkondo ya Myaka Amakumi Yatatu tayali na kupokelela ukusuminisha kwa kwa Lesa. “Ukulingana no kutunga kusuma,” e fisosa Funk & Wagnalls New Encyclopedia, “mupepi na citika wa bena Germany balilobele mu kati ka nkondo. Iminshipendwa ya misumba, amatauni, imishi na mafarmu mu Germany fyalyonawilwe umupwilapo. Mupepi ne fiputulwa fibili muli fitatu ifya maindastri, ubulimi, ne mibombele ya fya makwebo fyalibongolweke.”

Ukubomfya kwe shina Yehova pali ishi ndalama sha museke kutwibukishako ikambisho lyapeelwe kuli Israele ilya kuti: “Wilalumbula apa fye Ishina lya kwa Yehova Lesa obe; pantu Yehova takamulinge uwa kaele untu alumbula apa fye ishina lyakwe.” (Ukufuma 20:7) Nangu ni fyo, ishi ndalama sha museke shicitilo bunte ukuti ishina lya bulesa, Yehova, lyalishibikwa pa nshita ntali ku bantu ba mu Germany. Wamwishiba shani Lesa wakwata ilyo ishina?