Ukukuushishamo Mulopa Kwatontonkanishiwapo Cipya Cipya

MULI ino nkulo iswilemo inkumbabulili pa mulandu wa bulwele bwa AIDS, icintiinya cakulisha ku bumi bwa mulwele cili mu miputule ya mu cipatala umo balepwila abalwele. “Takwabako inshila twingalengelamo umulopa ukuba uwasanguluka umupwilapo,” e fyasosa Dr. Richard Spence, uyo ukucila pa myaka ikumi aba e ntungulushi ya Center for Bloodless Surgery (Icifulo apo Balepula Abalwele Ukwabulo Kubomfya Umulopa) pa Cooper Hospital-University Medical Center mu Camden, New Jersey, U.S.A.

Nga fintu twingenekela, ici cipatala cilondapa Inte sha kwa Yehova abengi, abo ukukaana kwabo ukwashimpwa pali Baibolo ukwa kukuushiwilwamo mulopa kwaishibikwa bwino. (Ubwina Lebi 17:11; Imilimo 15:28, 29) Nangu cibe fyo, abalwele bashili Nte abafulilako na bo baleya kuli ici cipatala, bali abayangwako pa lwa masanso yengafuma mu kukuushiwilwamo mulopa, ayasanshamo ukwambula ubulwele bwa ku libu, AIDS, na malwele yambi. “Ukwisako kwa bulwele bwa AIDS kwalilenga abantu ukumona ukukabila kwa kupima umulopa,” e fisosa Courier-Post Weekly Report on Science and Medicine. “Lelo utushishi tumo tulapula ukwabulo kutumona pa mulandu wa kuti umuntu kuti nakwata akashishi katandanya amalwele lelo te kuti kamoneke pa nshita umulopa ulepimwa.”

Pa mulandu wa masanso ya musango yo, ba Center for Bloodless Surgery babomfya ifya kusengulwilamo mu cifulo ca kukuushishamo mulopa, ukusanshako ukufumya no kubweseshamo umulopa umo wine uwa mulwele—inshila iyo baNte bamo bashingasanga ukuba iyalubana pe samba lya mibele imo.a Ukundapa na kumbi kusanshamo ukubomfya imiti iyo ifusha umulopa wa mulwele. Mu kulundapo, icayampana ku ca kupyanikisha pa mulopa cilabomfiwa mu tushita mu tushita ku kwaafwa ukupisha umwela wa oxygen ukwabulo kukuushishamo mulopa. “Inte sha kwa Yehova balafwaya ukundapa kwa cipatala ukwawamisha,” e fyasosa Dr. Spence, “lelo bafwaya ifya kusengulwilamo mu cifulo ca kukuushishamo mulopa.”

Inte sha kwa Yehova balatasha pa kubombela pamo no kwaafwa uko bafwiwa na badokota abacindika ukushininwa kwabo ukwa mipepele. Icafumamo caba ca kuti, balipokelela mu cine cine “ukundapa kwa cipatala ukwawamisha” kabili balisungilila kampingu wasanguluka pa ntanshi ya kwa Yehova Lesa.—2 Timote 1:3.

[Futunoti]