Ilyashi lya Bakabilisha ba Bufumu

Icebo ca kwa Lesa Calikwata Amaka ya Kwalula

UKULINGANA na fintu asumine umwine, aali “uwa miponto kabili kalamata kabili umukalushi.” (1 Timote 1:13) Lelo alyalwike! Ukwaluka kwa mutumwa Paulo kwali cintu cikalamba nga nshi ica kuti pa numa aali na maka ya kubilisha ati: “Mube abampashanya, ifyo na ine mpashanya Kristu.”—1 Abena Korinti 11:1.

Ilelo, imyanda ya makana ya bakapepa bafumaluka ukushinguluke calo conse baleyaluka mu nshila yapalako. Cinshi cibalenga ukucite fyo? Balomfwikisha ukwishiba kwaba mu Cebo ca kwa Lesa kabili balekubomfya mu bumi bwabo. Ica kukumanya cakonkapo cileebekesha ifyo Icebo ca kwa Lesa cakwata amaka ya kwalula.

Mu Slovenia abaupana babili abakote baleikala beka ku nse ya mushi umo ifi. Umulume, Jože, aali napamo ne myaka 60 iya bukulu kabili alikwete ubwafya ubukalamba ubwa kukunkuma ku bwalwa. Nalyo line, alisakamene umukashi wakwe uwalwele, Ljudmila. Ubushiku bumo Jože alitununwikwe kuli bakabilisha ba Bufumu babili. Alingishe aba baNte mu ŋanda, umo bamonene no mukashi wakwe. Ilyo aumfwile ubukombe bwa Bufumu, ifilamba fya buseko fyatendeke ukukonkoloka pa menso ya kwa Ljudmila. Jože na o wine aliipakishe cintu aumfwile kabili aipwishe ifipusho ifingi. Ilyo bashalike impapulo shilondolola Baibolo kuli aba baupana, baNte baliile.

Pa numa ya mweshi umo baNte balibweleleko, kabili bamwene icitabo ca Kuti Waikala Kuli Pe na pe muli Paradise Pe Sonde cili pa tebulo. Lintu bamwipwishe uko acifumishe, Jože atile: “Namwene nacisabankanishiwa pe bula lya ku numa ilya umo uwa bamagazini mwanshilile. E co nalembeele iofesi lyenu ilya mu Zagreb no kulombako icitabo.” Pa kumona ubuseko akwete, alilaalikwe ukuti engayasangwako ku Cibukisho ca mfwa ya kwa Kristu icali no kucitwa ku Ŋanda ya Bufumu. Icasekeshe baNte ca kuti, alishile!

Mu kwangufyanya isambililo lya Baibolo lyalitampilwe, kabili alilundulwike bwino nga nshi. Ku ca kumwenako, lintu Jože alangilwe ukufuma muli Baibolo ukuti “wilacita cabaswa, . . . nangu [ukufishinshimuna], nangu kufibombela,” bwangu bwangu alonganike ifilubi fya mipepele fyonse ifyali mu mwakwe, ukusanshako ifipasho fyonse, no kufipoosa.—Ukufuma 20:4, 5.

Icilaka ca kufwaya icine ca ku mupashi ico Jože akwete caleikushiwa. Ku ce shamo, nangula ni fyo, aacili nakwata icilaka na cimbi. Pa myaka mupepi na 18 aali nanwa amalita 7 aya mwangashi cila bushiku. Pa mulandu wa ubu bwafya bwakwe ubwa kunwa, talesakamana sana imimonekele ya pa lwakwe. Lelo ilyo asambilile fintu Lesa amona ukunwensha ubwalwa, apampamine pa kwaluka.

Alitukwite ukucimfya ubu bwafya bwa kunwensha panono panono, ukulalemba ubwingi bwa bwalwa alenwa cila bushiku. Mu kwipipa taali na kabili uwatekwo busha ku mwangashi. Mu kupita kwa nshita ilyo balesambilila Baibolo, na kabili aishilesambilila ukuti Abena Kristu ba cine balafwaikwa ukusungilila ubusaka bwa ku mubili. Muli fyo, apeele baNte indalama no kutila: “Muye munshitile ifya kufwala fyonse ifyo ndekabila pa kuti ndemoneka uwapempenkana ku kulongana kwa Bwina Kristu na mu mulimo wa mwi bala!” Ilyo babwelele baNte baali nabamushitila utuputula twa mu kati, insokoshi, insapato, amashati, ba suti, amatai, ne cola.

Pa numa ya kusambilila Baibolo pa mwaka umo, Jože na Ljudmila balifikilepo ku kuya na baNte mu mulimo wa kushimikila ku ŋanda ne ŋanda. Pa numa ya myeshi itatu balilangishe ukuipeela kwabo kuli Lesa ukupitila mu lubatisho lwa mu menshi pe bungano lya citungu ilya Nte sha kwa Yehova. Te mulandu no bukote no kulwalilila, Jože lyonse aleyako mu kushimikila imbila nsuma kabili pa numa, alebomba mu busumino ngo mubomfi utumikila mu cilonganino ukufikila imfwa yakwe mu May wa 1995. Ifisabo fisuma ifyatwalwa muli uyu mwaume waicefya no mukashi wakwe fipeelo bunte bwa kuti Icebo ca kwa Lesa calikwata amaka ya kwalula!