Bushe Uleibukisha?

Bushe mwalitesekesha ukubelenga bamagazini ba nomba line aba Ulupungu lwa kwa Kalinda? Cisuma, moneni nga kuti mwayasuka ifipusho fyakonkapo:

◻ Bushe amashiwi ya kwa Yesu aya kuti, “Nga mwalekelela imembu sha bamo, ninshi shalekelelwa kuli bene,” yapilibulo kuti Abena Kristu kuti balekelela imembu? (Yohane 20:23)

Takwabako icishinte ca mu Malembo ica kusondwelelo kuti Abena Kristu mu cinkumbawile, nelyo baeluda basontwa mu cilonganino, balikwata amaka ya bulesa aya kulekelela imembu. Ifyashinguluka ku mashiwi ya kwa Yesu fimoneko kulango kuti abatumwa balipayanishiwilwe ukupitila mu kubomba kwa mupashi amaka yaibela aya kulekelela nelyo ukwikasha imembu. (Moneni Imilimo 5:1-11; 2 Abena Korinti 12:12.)—4/15, ibula 28.

◻ Cinshi capulamo pa lwa bupilibulo bwa kwa J. J. Stewart Perowne ubwe buuku lya Amalumbo, ilyo mu kutendekelako lyasabankanishiwe mu 1864?

Mu bupilibulo bwakwe Perowne aeseshe ukukakatila “mu kupalamisha ku mibele ya ciHebere, monse mu milandile ya manshoko na mu musango wa grama.” Mu kucite fyo acimwene ifyo cisuma ukubwesha ishina lya bulesa mu musango wa “Yehova.”—4/15, ibula 31.

◻ Butungulushi nshi Yesu apeele abakonshi bakwe pa fya kubomba na mabuteko ya mu calo?

Yesu atile: “E ico peeleni ifya kwa Kaisare kuli Kaisare, ne fya kwa Lesa kuli Lesa.” (Mateo 22:21) Na kabili atile: “Uuntu akupatikisho kumushindika umushinso umo, uye nankwe imishinso ibili.” (Mateo 5:41) Yesu pano aalelangilila icishinte ca kunakila kwa kuitemenwa ku fifwaikwa fya mwi funde, nampo nga kuntu kukumine abantunse nelyo ififwaikwa fya buteko ifyo fileumfwana ne funde lya kwa Lesa. (Luka 6:27-31; Yohane 17:14, 15)—5/1, ibula 12.

◻ Cipilibula cinshi ‘ukwenda mu cine’? (Ilumbo 86:11)

Ici cisanshamo ukukonka ififwaikwa fya kwa Lesa no kumubombela muli bucishinka na mu kufumaluka. (Ilumbo 25:4, 5; Yohane 4:23, 24)—5/15, ibula 18.

◻ Cinshi cintu Yehova apwishishishe pa kutuma Yona ku Ninebe?

Nga fintu caishileba, umulimo wa kwa Yona uwa kushimikila mu Ninebe walangishe ubupusano pa kati ka bena Ninebe balapiile na bena Israele batalamike mikoshi, ababulishe nga nshi icitetekelo no kuicefya. (Linganyeniko Amalango 9:6, 13; Yona 3:4-10.)—5/15, ibula 28.

◻ Nani aaba e Nsoka kabili “umwanakashi” nani uwaloshiwako pa Ukutendeka 3:15?

Insoka taili ni nsoka ya cine cine lelo aba ni umo uwaibomfeshe, Satana Kaseebanya. (Ukusokolola 12:9) “Umwanakashi” te Efa lelo kuteyanya kwa kwa Yehova ukwa ku muulu, nyina wa babomfi bakwe abasubwa no mupashi aba pano isonde. (Abena Galatia 4:26)—6/1, ibula 9.

◻ Ni shani fintu umuntu engafuma muli Babele Mukalamba no kusango kucingililwa? (Ukusokolola 18:4)

Afwile ukupaatukako umupwilapo ku mateyanyo ya mipepele aya bufi na ku myata ya yako ne mibele ya mutima intu yatuninkisha, kabili lyene alingile ukusanga ukucingililwa mu kati na nkati ka kuteyanya kwa kwa Yehova ukwa teokrasi. (Abena Efese 5:7-11)—6/1, ibula 18.

◻ Mulandu nshi uo kapumpe alumbwilwa libili libili mu Malembo?

Bakalemba ba Baibolo baloseshe ku mibele ya kwa kapumpe pa kwimininako ifintu pamo nga amano, ukucingilila kwa bulesa, no kwangufyanya.—6/15, ibula 8.

◻ Bushe ababomfi ba kwa Lesa ilelo ababa ne subilo lya pe sonde balakwata umupashi wa kwa Lesa umo wine nge fyakwata Abena Kristu basubwa no mupashi?

Mu kwipifya, icasuko ni ee. Umupashi wa kwa Lesa e ko waba mu fipimo fyalingana ku mabumba yonse yabili, kabili ukwishiba no mucetekanya kuti fyafikwapo kuli bonse, mu kuba na mashuko ya mu nshita ayalingana aya kukwata kwene.—6/15, ibula 31.

◻ Mulandu nshi cabela ica kunonsha kuli ifwe ilelo ukulanguluka umulimo washila uwalebombwa na bashimapepo ba mu Israele mwi tempele mu Yerusalemu?

Mu kucite fyo kuti twaisatesekesha mu kucilapo kukumanina ukutantika kwabamo inkumbu umo abantunse ba lubembu ilelo beshila mu kuwikishiwa kuli Lesa. (AbaHebere 10:1-7)—7/1, ibula 8.

◻ Ni shani fintu itempele lya cibili ilyakuulilwe mu Yerusalemu lyaishilekwata ubukata ubwacila pa lyakuulilwe na Solomone?

Itempele lya cibili lyakokwele imyaka 164 ukucila pe tempele lya kwa Solomone. Bakapepa bafulilako ukufuma ku fyalo ifingi bakonkomokele mu mansa sha liko. Icacilapo kucindama, ili tempele lya cibili lyabele ilyaibela nga nshi pa mulandu wa kuti mu mansa sha liko e mo Umwana wa kwa Lesa, Yesu Kristu, asambilishe.—7/1, amabula 12, 13.

◻ Ni lilali lintu Lesa aleteleko itempele lyakwe ilya ku mupashi?

Ici cali mu 29 C.E lintu Lesa alangishe ukusuminisha kwakwe ipepo lya kwa Yesu ilya pa lubatisho. (Mateo 3:16, 17) Filya Lesa apokelele umubili wa kwa Yesu uwapeelwe nge lambo capilibwile ukuti mu mano ya ku mupashi, icipailo icacila pali cilya icali mwi tempele lya mu Yerusalemu calitendeke ukubomba.—7/1, amabula 14, 15.

◻ Mulandu nshi tulingile ukulalekelela bambi?

Ukulekelela kacita wa fibi uwapaapaata kulafwaikwa nga tuli no kusungilila ukwikatana kwa Bwina Kristu. Ubulwani no kusungilile cikonko kuti fyatupusulo mutende wa muntontonkanya. Nga tatulekelela, tuli mu busanso bwa kuti kasuba kamo Yehova takalekelele imembu shesu. (Mateo 6:14, 15)—7/15, ibula 18.

◻ Ni shani fintu abena Israele baali no kuba aba mushilo?

Bumushilo bwali no kucitikako fye pa kukwata kwabo ukwampana kwapalamisha na Yehova, Lesa wa mushilo, na ku kumupepa mu kusanguluka. Baalekabila ukwishiba kwalungikwa ukwa “Wa mushilo” pa kuti bengamupepela mu mushilo, mu kusanguluka kwa ku mubili no kwa ku mupashi. (Amapinda 2:1-6; 9:10)—8/1, ibula 11.