Ukufikilishiwa kwa Busesemo bwa Baibolo

MU ŊANDA ya babenye iya Imperial War Museum mu London, England, bakobekamo inkoloko iyaibela iibomba na malaiti iilangisha amanambala. Lintu inkoloko ileshinguluka, icipenda amanambala cilakankansha lintu papita amasekondi 3.31. Lintu yakankansha umuku umo na umo inambala imbi ilalundwako ku bwingi bonse. Ukukankansha kumo na kumo, inambala iili yonse, imininako umwaume, umwanakashi, nelyo umwana munono uwafwa ku nkondo mu kati ka uno mwanda wa myaka.

Ica kusontelela amanambala catendeke ukusunge mpendwa mu June 1989 kabili cilesubilwa ukupwishishisha ukupenda ubushiku pa kati ilyo bukalacela mu mwaka walenga 2000. Ukufika iyo nshita icipendo pa ca kusontelela amanambala cikaba nacifika pa mamilioni 100—icapimwa ukuba e mpendwa ya mfwa shayampana ku nkondo ukupulinkana umwanda wa myaka uwalenga 20 onse.

Mupepi ne myaka 2000 yapitapo, Yesu Kristu asobele inshita iyali no kwishibikilwa ku ‘luko ukwimino luko lubiye no bufumu ukwimino bufumu bubiye.’ Mu kulingana no ko kusobela, Inte sha kwa Yehova pa nshita ntali balishimikila ukuti inkondo sha bonaushi isha uno mwanda wa myaka, capamo ne finkukuma ifishaifulila, ifikuko, ifipowe, ne fya kucitika fimbi, ukufibika pamo fipeela ubushininkisho bwa kuti tuleikala mu “nshiku sha kulekelesha”—iciputulwa ca nshita icikonka pa kwimikwa kwa kwa Kristu ukuba Imfumu mu muulu mu mwaka wa 1914.—Luka 21:10, 11; 2 Timote 3:1.

Ulupungu lwa kwa Kalinda ukubomfya Baibolo ngo bulashi bwa luko, lusabankanya imbila nsuma ya kuti Ubufumu bwa kwa Lesa mu kwangufyanya bukonaula bakatitikisha no kwalule sonde ukuba paradise. Ni shani pa lwa cikacitika ku nkondo ku nshita ya ku ntanshi? Baibolo ilondololo kuti: “Iseni, mumone imilimo ya kwa Yehova, ifyo acito kupomona mu calo: aputulo bulwi ukufika ku mpela ya calo; ubuta abufuna, afuna ne fumo, amaceleta [ya nkondo] ayoca mu mulilo.”—Ilumbo 46:8, 9.

[Abatusuminishe Ukubomfya Icikope pe bula 32]

Inkoloko: No kusuminisha kwa Imperial War Museum