Magazini Uufika pa Mutima

BAMAGAZINI imintapendwa balalembwa ukushinguluke calo conse ku kwikusha ukufwaisha kwa bakabelenga ukwa fyebo nelyo ifya kusekesha.

Cinshi calenga magazini uno mukwete mu minwe ukuba uwaibela nga nshi? Kalata wakonkapo, uwapokelele iofesi linono ilya Watch Tower Society mu Germany, napamo alaasuka:

“Ndemutasha nga nshi, bamunyina batemwikwa, pa kupikintika kwenu no kubomba. Lintu ine na bana bandi babili twabwelele ukufuma ku kulongana, nangu cingati cali muli ba 21:30 hrs, natile kano fye nkutike kuli [kaseti] wa The Watchtower uo napokelele fye. Ilyo nalesamfye mbale, natendeke ukukutika ku cipande ca kusambililamo ica kubalilapo (April 1, 1995). Nayumfwile ukufwaisha kwa kukutikako na kabili, e co nalilekele ico nalecita mu kicini no kubelenga icipande [“Walyumo Mutengo mu Menso ya kwa Lesa!”] mu Ulupungu lwa kwa Kalinda ukukonka muli tepu. Yalifikile pa mutima wandi, ukucilisha paragrafu walenga bune no walenga busano. Natendeke ukulukushe filamba pa numa ya ico—lelo bwangu bwangu nalishinshimukile. Ndetasha Yehova pa kuba uwa mweo no kuba pa kati ka bantu bakwe na pe shuko lyandi, pamo pene na bambi abengi, ilya kwishibisha ishina lyakwe. Mu cine cine takuli umulandu wa kuyumfwila uwa fye. Umupashi wa kwa Yehova waliba na bantu bakwe. Shi ifwe bonse natushipikishe no kuba abashangila mu citetekelo, mu kwikatana. Namutumina ukutemwa kwa Bwina Kristu, nine nkashi yenu mu citetekelo.”

Ulupungu lwa kwa Kalinda lupeela ifyacila fye pa fyebo. Lulafika pa mitima ya balubelenga no kwikusha ukufwaisha kwabo ukwa ca kulya ca ku mupashi no kukoselesha kwa pa nshita yalinga. Ee, Ulupungu lwa kwa Kalinda lulapayanya “ifya kulya mu nshita iyene.”—Mateo 24:45.