Ilyashi lya Bakabilisha ba Bufumu

Ukwiminina Kwashangila pa Sukulu Kwalambulwa

BAIBOLO isobelo kuti: “[Abana bobe abaume, NW] bonse bakaba abasambilishiwa kuli Yehova, kabili umutende wa bana bobe abaume ukafula.” (Esaya 54:13) Mu nshila yatanununwa, inumbwilo ya kuti “abana bobe abaume bonse” kuti yabomfiwa na kwi bumba lyonse ilya babomfi ba kwa Lesa pano isonde, ukusanshako na bana banono. Ilelo, abafyashi ba Bwina Kristu balashininkisha ukuti abana babo ‘balesambilishiwa kuli Yehova’ pa ŋanda na pa kulongana kwa Bwina Kristu.

Ilyo bali ku sukulu, nangu cibe fyo, Abena Kristu bacaice balalolenkana na mafya yakosa. Ilingi line balacisanga ukuba icakabilwa ukwiminina mu kushangila ukushimpwa pa fyo basambilila muli Baibolo. Nga baiminina abashangila, ifya kufumamo kuti fyanonsha abasambi na bakafundisha kumo, nga fintu cilelangililwa ne ca kukumanya cakonkapo ukufuma ku Micronesia.

Pa kacishi kanono lwa ku masamba ya bemba wa Pacific ake shina lya Tol pa kati na nkati ka fishi fya Chuuk, bakafundisha mwi sukulu lya pa cishi baebele abana bonse ukupekanishisha no kusefyako holide wa pa sukulu uwa Halloween. Abana be sukulu Inte balishibe ukuti uku kusefya kwali no kubimbamo ifya kuyemfya ne fya kufwala filelangisha imilungulwa, ifibanda, ne ndoshi—fyonse fine ifyalundana ne fishilano fya kupupe mipashi. Bakampingu wa aba bana balibakeenye ukusefyako.a

Ukufuma ku kukansha kwabo ukwashimpwa pali Baibolo ku ŋanda na mu cilonganino ca Bwina Kristu, balishibe ukuti ifibelesho fya musango yo tafiteemuna Lesa, nangu nga filesefiwa nge fya kusekesha fye. Pa kwaafwa ukulondolola ukwiminina kwabo bwino bwino, abana balaalike Barak, umo uwa bamishonari ba Nte pali cilya cishi, ukulanda na bakafundisha babo.

Pa numa ya kukutika ku bulondoloshi, bakafundisha batantike ukuti kukabeko ukukumana kwalenga bubili, apo Barak engalanda ku babomba pali ili sukulu bonse. Pali uku kukumana, Barak alondolwele ifishinka ku kulangisha cintu Halloween yaba mu cine cine. Afumishe ifyebo fyakwe mu mpapulo sha Watch Tower ishafulilako pamo pene ne mpapulo shimbi. Bakafundisha na balashi balisungwike pa co basambilile pa lwa kwafumine uku kusefya, ifyo kwakokola, ne fyo kwalundana na mapepo. Bapingwilepo ukukumana bonse ku kumona ifyo baali no kupwisha ubwafya.

Inshiku shinono pa numa, kwaliko ukubilisha kushaenekelwe. Amapekanyo yonse aya Halloween yalifumishiwepo. Isukulu talyali na kusefya Halloween ulya mwaka. Mwandi ca kufumamo cishaiwamina icafumine ku mupampamina wa kucite calungama pa sukulu kuli ishi Nte shacaice! Abacaice tabalekabila ukutiina nelyo ukuba ne nsoni ukwiminina mu kushangila ku lubali lwa cine ca Baibolo.

Ukushinguluke calo conse, Inte sha kwa Yehova balasambilisha abana babo ukubombesha ku sukulu. Inte shacaice na kabili shilakanshiwa ukwikala umwabela ifishinte fya Baibolo no kwebako abo basambilila na bo isubilo lyabo ne fisumino lintu bakwata akashita. Nangu line takuli ififuminemo ifisuma nelyo ifya mu kwangufyanya nga fintu cali muli uyu mulandu, imisepela kuti yacetekela no kwikushiwa pa mulandu wa kucite calungama. Kabili icacilanapo kucindama, kuti bashininkisha ukuti Shibo wa ku muulu aleteemunwa kabili ali no kubapaala pa cumfwila cabo ica busumino.

[Futunoti]