Ni Bani Bakaba Bakabila ba Mbila Nsuma?
PA KUKUMANA kwa World Council of Churches imyaka 40 iyapitapo, aba muli kalya kabungwe bacincishiwe “ukwaula mu mupashi wa bukabila bwa mbila nsuma” no kusambilisha imikuni yabo “ukusalanganina konse mu kubile mbila nsuma.” Imyaka isano pa numa John A. O’Brien, shimapepo wa ciKatolika, alembele pa lwa kukabila kwa kuletako abasambi abapya “ukupitila mu kuya kuli bene” kabili te “ku kwikala fye mu mayanda yesu.” Kabili mu January 1994, Papa John Paul II asosele ukuti “taili ni nshita ya kumfwile Landwe insoni, ni nshita ya kushimikila lyene apabuuta.”
Cilemoneka kwati uku kulomba kwa kuputaukisha ukwa kufwaya bakabilisha ba mbila nsuma tabakupoosako mano. Icipande mu nyunshipepala ya mu Australia iya Illawarra Mercury calondolwele ukuti: “Bakatolika Balumbuka aba ku Lulamba lwa ku Kapinda ka Kuso tabafwaya ukubomfyako mu busumino bwabo inshila ya mitununukile iyakwata Inte sha kwa Yehova.” Umwaume umo atile ukubila imbila nsuma awe “takwabamo mu mintontonkanya ya ciKatolika.” Umbi apelulwilepo ati: “Caliwama Icalici ukulaitwale line pa ntanshi, lelo te kupitila mu kukonkonsha pa fiibi. Nakalimo ukubomfya amasukulu nelyo ukutuma bakalata kuti kwabako bwino.” Nelyo fye mukalamba wa cikuulwa cikalamba ice calici lya mu bwikashi taashininkishe ifyo engalondolola amashiwi ya kwa papa. “Kuti twakoselesha abantu mu nshila bekalilamo abene ukulaikala ukulingana ne Landwe lintu baishiba,” e fyo asosele. “Nampo nga ico cilepilibulo kuti kuya mu kukonkonsha pa minshi nshingalandapo akantu.” Umutwe wa lyashi uwa cipande ca muli iyi nyunshipepala wasupawila cene bwino ukuti: “Bakatolika tabakomfwile ukulomba kwa kwa Papa ukwa kuya ku kushimikila.”
Te mulandu na fintu Kristendomu afilwa ukubile mbila nsuma, Inte sha kwa Yehova ukucila pa mamilioni yasano balekonka ikambisho lya kwa Yesu ilya ‘kuya no kulenga aba nko shonse ukuba abasambi.’ (Mateo 28:19, 20; linganyeniko Imilimo 5:42.) Ukushimikila kwabo ukwa ku mwinshi no mwinshi nomba kulecitwa mu fyalo ukucila pali 230. Ubukombe buntu baleta bwaba ubwashininkishiwa, ubwebekesha amalayo ya kusungusha aya mu Baibolo aya ku nshita ya ku ntanshi. Mulandu nshi mushingalandila na bene umuku ukakonkapo lintu bakatandala?