“Kanshi Icalici Lyenu Lyabela Kwi?”

INTE SHA KWA YEHOVA mu Mozambique ilingi line balepushiwa ici cipusho. Ukwabula ukupita mu mbali, pa nshita ntali caliba cipusho icayafya ukwasuka kano fye pali nomba line apa. No mulandu wa kuti Inte sha kwa Yehova tabaishibikwe mwi funde muli ici calo ukufikila mu 1991. E ico, tacali na kucitikako ukukwata ififulo fya kupepelapo ifyaishibikwa bwino kabili ifyapampamikwa.

Nangu cibe fyo, imibele ya musango yo yalyalwike pa February 19, 1994. Pali bulya bushiku bwakabisha, pa mulandu wa kasuba kalotoka, Amayanda ya Bufumu aya kubalilapo ukukuulwa yabili mu Mozambique yalipeelwe. Ubwingi bonse pamo ubwa bantu 602 baliishile ku kupeela ifi fifulo fya kulonganinamo ifishaiwamina mu musumba wabelamo icabu uwa Beira, lwa pa kati ka lulamba lwa Mozambique. Yakalabomfiwa ku filonganino fitatu ifya muli ulya musumba.

Ubukuule bonse, ukufuma pa kwimba umufula ukufika ku kupwishishisha ifikuulwa, bwasendele umwaka umo ne myeshi ibili iya kubombesha. Ilingi line aba kuitemenwa 30 nelyo ukucilapo ukufuma mu calo ca mu bwina mupalamano ica Zimbabwe baleisa no kubombela capamo na bamunyina ba ku Mozambique. Apantu balifulile ica kuti te kuti bonse bakumane ukwikala mu ŋanda ya bamishonari mu Beira, iyalebomfiwa nge cifulo ca pa kati ica bwangalishi, bamo baleimika amatenti mu lubansa pa mpela sha mulungu kabili pa tushita tumo pa milungu yafulilako.

Icifulo ca Ŋanda ya Bufumu iibomfiwa ne filonganino fya Massamba na Munhava cabela mu musebo ukalamba uwa Beira. Mishonari umo asosele ukuti: “Pa bushiku bwafulishamo ifya kucita, lintu umulimo waleendesha ica kuti no kulunduluka kwalemoneka nga nshi, twalemona uko banamutekenya balepitila mupepi balepana ukupanga amasanso pa mulandu wa kulolekesha Iŋanda ya Bufumu, ni cikanga balabe ukuti baleensha.” Abengi baleiminina ku kutamba umulimo, kabili balepeshiwa amano apakalamba pantu kwali aba mishobo yapusanapusana abalebombela capamo ngo muntu umo.

Kwaliko ukupekanya kukalamba no kuteyanya pa kuti umulimo ubombwe. Mu kupusanako na makuule yambi ayengi aya muli ulu lubali lwa calo, uko ifisolobelo ne fipe fimbi ifya bukuule fishimonaika, umulimo wa kukuula Amayanda ya Bufumu tawabalile awiminina pa mulandu wa kubulisha ifibombelo. Pa kashita kamo, kwalekabilwa imifuko ya sementi 800, kabili icifulo fye ceka icali na sementi tacakwete imifuko ikabilwa umwa kulonga yene. Bamunyina baipwishe iofesi lya musambo ilya Watch Tower Society mu musumba wa bwangalishi, uwa Maputo; imifuko yalituminwe ukubomfya indeke, ukutwalwa uko bapangila sementi, no kulongwamo. Umulimo walitwalilile ukwabula ukupumfyanishiwa.

Pa kashita na kambi, lintu balepanga umutenge, bakabomba basangile ukuti inshimbi shapwa. Pa mulandu wa kuti shalyafishe nga nshi ukusanga, inshimbi sha bukuule shalefuma ku cifulo apalepele bakilomita 600! Umwaume uwaletambako alitununwikwe kuli umo uwa bakabomba no kwipushiwa nga ca kuti alishibeko uko bengasanga inshimbi sha kupwishisha umulimo. Umwaume ayaswike ukuti: “Njiminine pano ukucila pe awala limo, kabili ici tacaciba fye nkuma. Ninkumbwa nga nshi umulimo untu mulebomba no mupashi untu mulebombelamo. Ninkwata inshimbi shintu mulekabila, kabili kuti natemwa ukumupeela ngo bupe.” Cashininkishe ukuba ukupayanya kwa pa nshita yalinga.

Abaletambako abengi balefwaisho kwishiba akampani ka bukuule kalesakamana uyu mulimo. Bakabomba, ukwabulo kutwishika, baali aba buseko nga nshi ukubeba ukuti aba baali ni Nte sha kwa Yehova abaitemenwe ukubomba. Cinshi nakucilisha icasungwishe abaletambako? Umo asosele ukuti: “Muli bantu baikatana. Nangu cingati mwaba aba mishobo yapusanapusana, mubombela capamo nga ba bwananyina.” Ica kufumamo ca kuti abengi baishile mu kwipusha ukusambilila Baibolo. Calyambukila fye no kulongana. Ku ca kumwenako, mu cilonganino ca Manga, impendwa ya Nte kuti yaingilamo ukucila pa miku ibili mu mpendwa ya basangwa ku kulongana.

Amayanda ya Bufumu ayapya mu cine cine yaliba lipaalo lishaikulila kuli baNte ba mu Mozambique. Kale abengi balelonganina mu fipaka mu kuba no mutenge wa fyani nelyo uwa malata fye aya kupenda, ukulonganina ku lukungu lwa ŋanda, nelyo mu muputule unono uwa mayanda fye. Ilingi line balelokwa mu mainsa; nalyo line balesangwa ku kulongana mu busumino. Pa makumi ya myaka ayengi ifi fifulo fyali fye e “Mayanda ya Bufumu” ayo Inte mu Mozambique baishibe. Munyina Caetano Gabriel, eluda mu cilonganino ca Massamba, abilishe ukuti: “Tuletasha nga nshi kuli bamunyinefwe ukushinguluke calo conse abasangwilileko ku kupwishishiwa kwa ubu bukuule.” Nte umo uwacaice aibukishe ukuti: “Lintu twali mu Carico (inkambi sha kucushiwilwamo umo Inte sha kwa Yehova shasungilwe pa myaka mupepi na 12), twalesosa atuti, ‘Tuli no kushipikisha mu busumino, kabili Yehova akatulambula.’ Iŋanda ya Bufumu iipya ili cilambu ukufuma kuli Yehova.” Amashiwi yabo yalelumbulula ukutasha kwashika no mupampamina wabo uwa kulumbanya Yehova.

Imisepela iingi iyabombeleko umulimo wa bukuule yalyambukilweko no mupashi wa bupainiya kabili pa numa ya bukuule batendeke ukubomba ubutumikishi bwa bupainiya bwa nshita yonse. Isabel munono, painiya wa nshita yonse mu cilonganino ca Manga, ilyo alelolesha pa Ŋanda ya Bufumu apa kuti teti umonepo ne fiko ninshi kwashala fye ubushiku bumo ukuti ipeelwe atile: “Kuli ine ici e cifulo cacilishapo kuyemba muli uno musumba wa Beira. Ndi uwa buseko nga nshi ukuba pano.” Adão Costa, mishonari, alondolwele ukuti abalashi ba cikaya balibombele capamo na ifwe nga nshi ukutusuminisha ukulete fipe fimo mu nshila yaibela pa mulandu wa kuti balishibe ubufumacumi bwa Nte. Lyene alundileko kuti: “Nangu cingati twalinakile nga nshi, cali buseko ukumona ifisabo fya kubombesha konse uku ukwa kulumbanya no kucindika Yehova.”

Pali nomba, ilili lyonse lintu umwikashi wa bucibusa mu musumba wa Beira aipusha ati, “Kanshi icalici lyenu lyabela kwi?” Inte shimusontelela kuli imo iya Mayanda ya Bufumu yabili ayapya no kwankulako mu kuba na mashiwi ya kuti, “Isangwa mu Musebo wa International Road, Avenida Acordo de Lusaka, mupepi fye na kamba ka bakapokola aka Fourth Squadron Police Station.” E lyo balungikako panono abati, “Kwena te calici iyo. Ni Ŋanda ya Bufumu!”

[Mapu ne Fikope pe bula 20]

(Nga mulefwaya ukumona mapu, moneni muli magazini)

AFRIKA

Mozambique

Beira

Maputo

[Abatusuminishe]

Mapu: Mountain High Maps® Copyright © 1995 Digital Wisdom, Inc.