Ni Ani Uwingapeelwa Umulandu pa Nkondo?
BUSHE Lesa e wingapeelwo mulandu pa nkondo shilwikwa no mutundu wa muntu? “Iyo, Lesa tafwaya inkondo.” E fyo Martin Niemöller, shimapepo waishibikwa uwa ku German uwa ciProtestanti ayaswike ici cipusho mu kwangufyanya fye pa numa ya kupwa kwa Nkondo ya Calo iya Cibili. Ukulandapo kwakwe kwasabankanishiwe mu 1946 mu citabo ca mutwe wa kuti Ach Gott vom Himmel sieh darein—Sechs Predigten (Mwe Lesa, Shi Moneni Ukufuma mu Muulu—Amalyashi Mutanda).a Ici citabo cisosa ukuti:
“Uuli onse uufwaya ukupeela Lesa umulandu pa [nkondo] taishiba, nelyo tafwaya ukwishiba, Icebo ca kwa Lesa. Kwena, cintu capusanako ukuti nampo nga ifwe fwe Bena Kristu twalikwatako umulandu muli ishi nkondo shishipwa nelyo iyo. Kabili tatwingafyuka ici cintu mu kwanguka. . . . Kuti na kabili twaibukisha bwino bwino ukuti amacalici ya Bwina Kristu, ukupulinkane inkulo, baliipelesha libili libili ku kupaale inkondo, ifita fya nkondo, ne fyanso no kuti balipepeelo konaulwa kwa balwani babo mu nkondo mu nshila yacilapo ukukanabe iya Bwina Kristu. Uyu onse uli mulandu wesu kabili mulandu wa bashifwe, lelo Lesa tengapeelwo mulandu napacepa. Na ifwe fwe Bena Kristu ba lelo tuli ne nsoni pa ntanshi ya cakaniko ico beta abati Abasambi ba Baibolo aba Mukoosha [Inte sha kwa Yehova], abaile imyanda na makana mu nkambi sha kucushiwilwamo no [nangu fye] ukufwa pa mulandu wa kukaanabomba umulimo wa fya nkondo no kukaana ukwipaya abantu.”
Ilelo, mupepi ne myaka 50 pa numa ya nkondo ya Calo iya Cibili, amashiwi ya kwa Niemöller yapayanishisha abantu batemwa umutende ica kutontonkanyapo. Iyo, Lesa tewingapeelwo mulandu pa kusumyo mulopa kwa nko! Mu kushininkisha ukupitila muli bakapepa bakwe aba cine, abataluka ku kukansana kwa mu calo, Lesa alebilisha impela isungamine iya nkondo shonse.—Ilumbo 46:9; Yohane 17:16.
[Futunoti]
a Amalyashi ya kwa Martin Niemöller pa numa yaishilesabankanishiwa mu cingeleshi mu citabo Of Guilt and Hope. Nangu cibe fyo, ukulembwa kwa ciNgeleshi kwalipusana no kwa ciGerman ukwa kutendekelapo, e ico kuno kwambula kupilibwilwe ukufuma mu citabo ca ciGerman cine.
[Abatusuminishe Ukubomfya Icikope pe bula 32]
USAF photo