Bushe Fyonse Fyaba Kusokolola kwa Bulesa?

BUSHE umupashi wa kwa Lesa, uwapuutilemo Baibolo wa Mushilo, kuti washingamwa na ku fitabo fimbi ifyo bambi bamona nge fyashila? (2 Timote 3:16) Ici cipusho caimishiwe ne nyunshipepala ya baJesuit iya ku Italy (La Civiltà Cattolica), iyasabankanishiwe “no bwangalishi bwa Secretariat of State (Akabungwe Kakalamba) [aka ku Vatican]” na muli fyo yamwenwe iya bulashi monse umwaba baKatolika.

“Lesa, ukupitila mu kubomba kwa Mupashi wa Mushilo, asalangenye ulubuto lwa Cebo na mu fitabo fyashila fimbi ifya cishiilano ca bashili baYuda na bashili Bena Kristu,” e fyasosele iyi nyunshipepala ya ciJesuit. Ku baJesuit, ifitabo “fya mushilo”, pamo nga Avesta wa kwa Zoroaster nelyo Ifitabo Fine ifya kwa Confucius, fyalembelwe “mu kuba no kusonga kumo ukwa Mupashi wa Mushilo, e ico kanshi, ku cipimo cimo yalikwatamo ‘ukusokolola kwa bulesa.’”

Nangu cibe fyo, ulupapulo lwacilengo kumfwika. “Te fyonse fyaba mu fitabo fyashila ifya musango yo fyaba cebo ca kwa Lesa,” e fyo lwalondolola, ukulundapo ukuti abo balembele fi fitabo kuti nalimo “balikumenye ukusonga kwa cifulo uko bapepa balesa abengi nelyo ifyashingulukako fya mano ya buntunse” umo baikele no kubomba. Ukulingana na Marco Politi, uulemba pa milandu ya Vatican mu nyunshipepala ya ciItalian iya La Repubblica, iyi mimwene “iletako ifishaletontonkanishiwa akale ukuti kuti fyacitikako mu kwampana pa kati ke Calici lya ciKatolika ne mipepele ikalamba iya mu lyashi lya kale,” ukubwelelela ku kukumana kwa mapepo ukwa kukumbinkanye fisumino pamo ngo kwali mu Assisi mu 1986, ukwasumbwilwe mu kukosa na John Paul II.

Yehova taba ni Lesa wabulo muyano no wa cimfulumfulu. (1 Abena Korinti 14:33) E co te kuti mu kulungika tusondwelele ukuti umupashi wakwe uwa mushilo, nelyo amaka yabomba, kuti wapuutamo nangu fye ciputulwa ca fitabo ifishaba mu kumfwana kwakumanina ne Cebo cakwe, Baibolo. Mu cifulo ca kukoseleshe nshila sha kukumbinkanye fisumino pa kati ka “fishilano fya mipepele” yapusana, umutumwa wa Bwina Kristu Paulo alembele ukuti kwaba “ukucetekela kumo . . . , Shikulu umo, ukutetekela kumo, ulubatisho lumo.”—Abena Efese 4:4, 5.

Uko “kucetekela kumo” kwashintilila pa kubike icitetekelo muli Yesu Kristu. Baibolo mu kulingisha itila: “Ne pusukilo talili muli umbi nakalya, nangu lishina limbi takuli mwi samba lya muulu ilyapeelwa mu bantu, umo tuli no kupusukila.” (Imilimo 4:12) Takwaba “icitabo ca mushilo” cimbi icilondolola Yesu pamo ngo muntu watontwapo mu kubomba kwa mifwaile ya kwa Lesa. Ni lyeka fye lintu twapokelela Baibolo pamo nge Cebo ca kwa Lesa e lintu ingatusambilisha pa lwa kupayanya kwabamo kutemwa ukwa kwa Yehova Lesa ukwe pusukilo.—Yohane 17:3; 1 Abena Tesalonika 2:13.