Ukwasuka Imilandu ya Bufi mu France

INTE SHA KWA YEHOVA mu France pali nomba line bali ca kutontapo imilandu ya bufi iishaifulila. Ukushukila ifya kuponako fya bulanda ifilebimbamo imipepele ya kusefya ku Bulaya na ku Japan, abasabankanya amalyashi baanenye ifyebo fyanyongana pa lwa Nte. Mu cilubo balondolwelwe ukuti baba pa kati ka mipepele ya kusefya iyakulisha kabili iyabesha iya busanso.

Mu kubombesha kwa kufwaisha ukulungike fintu, Inte sha kwa Yehova shasabankenye trakiti uwayaswike ifipusho pamo nge fi: Inte sha kwa Yehova ni Bani? Bushe Bena Kristu? Bushe balaya ku cipatala ku kundapwa? Mulandu nshi bayila ku mwinshi no mwinshi? Ni kwi kufuma indalama sha kwafwilisha umulimo wabo? Ni mu nshila nshi Inte sha kwa Yehova shafwilamo ubwikashi?

Trakiti waisulamo ifyebo mu lulimi lwa ciFrench akwete umutwe wa kuti Inte sha kwa Yehova—Ico Mufwile Ukwishiba. Pa kuti uyu trakiti engashalikwa ku bantu abengi nga nshi, kwaliko kampeni uwateyanishiwe. Ukufuma pa May 13 ukufika ku June 9, 1996, batrakiti ukucila pa mamilioni 9 balyananishiwe.

Uyu trakiti alitemwikwe ku bantu abengi, ukusanshako ababomfi ba buteko. “Ukulengulula uko balengulula Inte sha kwa Yehova kulankalifya nga nshi,” e fyalembele umulashi wa buteko bwa cikaya mu citungu pa numa ya kubelenga trakiti. “Imiku iingi nalitesekesha ubusuma ne mibele yabulamo akaso iya mulimo wenu.” Pa kulandapo pali trakiti, shicilye wa mu ŋanda ya mafunde iya European Parliament alembele ukuti: “Abantu abengi balishiba bwino bwino ifya kulekanya ibumba lya Bena Kristu ilyo mwabamo ukufuma ku mipepele ya kusefya.”

Mu Brittany Nte atambike trakiti kuli shimapepo, uwaipokele bwangu bwangu. “Ndemutasha pa co mulecita,” e fyasosele shimapepo. Lyene alundileko kuti: “Ndakoselesha abesa ku calici ku mwesu ukumupokelela mu mayanda yabo no kumupangilako kofi. Kuti mwaeba fye na bo mwakumanya ukuti mwalishile ku ŋanda ku mwandi. Ndefwaya no kumweba ukuti ndatasha nga nshi ukubelenga impapulo shenu.”

Pa numa ya kupokelela trakiti, umwaume uupepa kuli baProtestanti mu Alsace alembeele Watch Tower Society ukulomba isambililo lya Baibolo. Alembele ukuti: “Pa numa ya kusuula icalici lyandi, ndefwaisha ukutendeka cipya cipya lwa ku mupashi.” Ukukanasakamana imilandu ya bufi iyo inshita shimo bababepesha, Inte sha kwa Yehova mu France—mu cine cine, aba mwi sonde lyonse fye—batwalilila ukwaafwa abantu ukufika ku kwishiba kwalungikwa ukwa mifwaile ya kwa Lesa, nga fintu yalondololwa muli Baibolo.—2 Timote 3:16, 17.