Bushe Ubufumacumi Ni Kuli Cela Mushuke Nelyo Kusalapo?
“NANGU cingati mu cifyalilwa fye nshili wa bufumacumi, inshita shimo shimo ndaba kuli cela mushuke.” E fyasosa umuntu wabulwa ubufumacumi Autolycus mu citabo ca kuti The Winter’s Tale icalembelwe na William Shakespeare. Ici cilelangilila ubunake bukalamba ubwa muntu ukulemenena uko twalemenena ku kucite cabipa, ne cifumamo “mutima wa kufutika.” (Yeremia 17:9; Ilumbo 51:5; Abena Roma 5:12) Lelo bushe ici cilepilibula ukuti te kuti tusalepo muli uyu mulandu? Bushe ubulumba bwaba fye ni kuli cela mushuke? Awe iyo!
Ilyo abana ba Israele tabalaingila mu Calo Calaiwe, Mose alandile na bene ilyo baimike nkambi mu mawanga ya Moabu. Abalondolwelele ifya kusalapo fibili. Kuti baumfwila amafunde ya kwa Lesa no kupokelela ipaalo lyakwe nelyo ukuyakaana no kulobolola icisabo cabipa ica lubembu. (Amalango 30:15-20) Baali no kusalapo ifyo baalefwaya.
Apo tuli fibumbwa ifiisalila, na ifwe bene tuli no kusalapo. Takuli nangu umo—ukusanshako Lesa—uutupatikisha ukucite cisuma nelyo icalubana. Nangu cibe fyo, bamo kuti baipusha bwino abati, ‘Nga ca kuti imitima yesu yalemenena ku bubi, ni shani fintu twingacite cisuma?’ Kwena, dokota wa meno alabebeta ameno mu kusakamanishisha pa kuti engasanga ayaleingililwa nelyo ayalebola ilyo cishilabipisha. Mu kupalako, tulekabila ukubebeta umutima wesu uwa mampalanya pa kufwaya ukusanga ubunake no kubola kwa mibele. Mulandu nshi? Pantu “mu mutima e mufuma amatontonkanyo ya bubifi, imisoka, ubucende, ubulalelale, ukwiba, ubunte bwa bufi, imiponto,” e fyasosele Yesu.—Mateo 15:18-20.
Pa kusungilila ilino, dokota wa meno afwile ukulobolamo ifyabola fyonse ifyo asanga. Mu kupalako, ukubombapo kwa maka kulakabilwa pa kufumya mu mutima “amatontonkanyo ya bubifi” no lunkumbwa. Ukupitila mu kubelenga no kutontonkanya pa Cebo ca kwa Lesa, Baibolo, tuleshiba inshila sha kwa Kabumba wesu ukusanshako no kusambilila ukucite calungama.—Esaya 48:17.
Imfumu ya Israele Davidi alishukiile ukwaafwa kukabilwa na kumbi mu bulwi bwa kufwaya ukucite calungama. Apepele ukuti: “Nengeleni umutima uwasanguluka, mwe Lesa; no kubwekeshapo ukulenga mu kati ka ine umutima uwashangila.” (Ilumbo 51:10) Ee, ukupitila mu kushintilila pali Yehova Lesa mwi pepo, na ifwe bene kuti twaansha ukulemenena uko twalemenena ku kucite calubana no kulundulula “umupashi upya” (NW) ku kucite cisuma. Muli iyi nshila, tatwakalekele ubufumacumi ukuba fye kuli cela mushuke. Cikaba cintu ico tukasalapo.
[Icikope pe bula 21]
Nga fintu cali kuli Davidi, ipepo kuli Yehova kuti lyatwaafwa ukucite cisuma