We Mabuuku Ulafula!

“Ku kucita amabuuku ayengi takuli mpela,” e fyalembele Imfumu ya mano Solomone uwa pa kale. (Lukala Milandu 12:12) Mu 1995 pa bantu abali bonse 580 abekala mu Britain palisabankanishiwe ibuuku limo, ukulenga cilya calo ukuba pa ntanshi mu kusabankanya amabuuku ayapya. China, icalo cafulishamo abantu, e wakonkelepo uwasabankenye amabuuku ayapya 92,972 ukulinganya kuli 95,015 ifyasabankenye Britain. Pakonkele Germany uwakwete amabuuku 67,206, e lyo ni United States (49,276), ukukonkwapo na France (41,234). “Icilengele Britain ukuba pa ntanshi mu calo conse maka maka cili fye mulandu wa lulimi lwa ciNgeleshi epela,” e fyalandapo inyunshipepala ya The Daily Telegraph iya ku London.

Amalipoti yalelanga ukuti ubukwebo bwa mabuuku nabubwelela pa nshi pa myaka yafulilako, kabili nomba maperesenti fye 80 aya bakalamba mu Britain e bashitako ibuuku limo nelyo ukucilapo mu mwaka umo. Lelo bushe abantu balabelenga amabuuku yonse yantu bashita?

Ibuuku limo fye ilyatwalilila ukwananishiwa no kubelengwa sana ni Baibolo, nomba iyabako mu fiputulwa nelyo yonse fye mu ndimi ukucila pali 2,120. Nga ca kuti tamulati mukwateko Baibolo wenu, ipusheni iofesi lya Watch Tower Society ilyapalamina na kuntu mwikala ukuti mukashiteko. Nga mwalikwata Baibolo, ibuuleni no kubelenga Amalembo yaleloshiwako ayalemoneka mu fipande fya uno magazini. Pa kucite fyo, muli no kusanga ukwishiba kupeelo bumi ukwaba muli Baibolo.