Icilye Casumbukisha ica ku Connecticut Casumbula Insambu sha Mulwele

Pa Apirl 16, 1996, Icilye Casumbukisha ica ku Connecticut, U.S.A., casumbwile insambu sha Nte sha kwa Yehova isha kukaana umulopa. Uku kupingula kwafumishepo ukupingula kwa cilye cabalilepo.

Mu August 1994, baNelly Vega, Inte ya kwa Yehova, balitendeke ukusuuma umulopa uwingi pa numa ya kubeleka. Ukubombesha ukwa kuti bengalesha ukusuuma umulopa takwabombele. Ilyo imibele intu baNelly balimo yabipileko, icipatala caeseshe ukupoka insambu ku cilye isha kubika umulopa. BaNelly balisaine kale medical release (icipepala icilubulako badokota ku fingafuma mu kupingulapo kwa mulwele) iyalekambisho kuti umulopa nelyo ifyapangwa ku mulopa tafifwile ukubikwa mu mubili wabo ilyo bacili mu cipatala, na muli fyo ukulubulako icipatala kuli fyonse ifingacitika pa mulandu wa kupingulapo kwabo. Nangu cibe fyo, icipatala calipaashishe ukuti ukubapatikisha umulopa kuti kwaba kwafwilisha akanya, ako icipatala cakonkomeshe ukuti kalekabila nyina. Ne cilye na co calisakamene ukuti, te kulufya fye umulopa kweka, baNelly bali bakashana abaali no butuntulu busuma ubwa bumi. Na muli fyo, te mulandu no kuilishanya kwa baVega bene na ndubulwila wa bakashi babo, icilye calipeele icipatala insambu no mulopa walibikilwe.

Mu nshita, umulandu walitwelwe ku Cilye Casumbukisha ica ku Connecticut. Kulya, calipingwilepo ukuti imibombele ya cipatala yalipokolwele baNelly insambu. Ubupingushi bwasosele ukuti: “Ukulubulula ku cilye cabalilepo kwali pa kati ka bushiku, mu mibele ya bukangalume sana ica kuti icipatala na baVega bene tabakwete nshita ya kulanda ifishinka bwino bwino.”

Uku kupingulapo kwa Cilye Casumbukisha ica ku Connecticut kuli ukwakatama te ku Nte sha kwa Yehova sheka lelo na ku bantu bambi. Ndubulwila wa baNelly, Donald T. Ridley asosa ukuti: “Nakukatama ku balwele bonse abashingasuminishanya no kupingulapo kwa ba dokota. Ukupingulapo uku kukalesha ifipatala ukutitikisha ifishinte fyakatama ifya balwele te mulandu nga fya mipepele nelyo ifya ku calo.”