Balishangile Ilyo Balepakaswa ku BaNazi

BUMPOMFU ubwabula umwenso ubwa Nte sha kwa Yehova mu Nazi Germany bwalipusanininako sana ku mibele amacalici ya Kristendomu yakwete. Ici casoselwe na profesa we lyashi lya kale John Weiss mu citabo cakwe ica Ideology of Death. Alembo kuti:

“Mu 1934 icalici lya Evangelical lyapampamine ukuti abaNazi bafwile ‘ukupokelelwa na Abena Lutheran,’ no kutasha ‘Shikulu Lesa’ pa kupeela abena Germany ‘shikulu wa ba shikulu uwa bukapepa kabili uwingacetekelwa.’ . . . Shikofu wa ba Protestanti alembeele shimapepo wakwe ukuti, ‘[Hitler] atuminwe kuli ifwe na Lesa.’” Weiss atwalilila ukuti: “Icalici lya Methodist ilya ku Germany . . . lyalisuminishenye na Shikofu Dibelius ukuti Hitler napususha Germany kuli bumwaluka bwa kwa Bolshevik ubwapalamishe, ukuleta umutende no kushikatala . . . Icalici lya ciMormon lyaebele abantu baliko ukuti ukulwisha Hitler kwali kutoba ifunde lya ciMormon.” Kabili alundilepo ukuti: “BaKatolika baebelwe ukuti wali mulimo washila ukumfwila ubuteko bupya ubwa ciNazi, umulimo uushalekelwe nangu ca kuti ifibi abena Nazi bacitile ku kabanga ka ku Bulaya fyalishibikwe kuli bashimapepo.”

Lelo ni shani ku lwa Nte sha kwa Yehova? Profesa Weiss asoselo kuti “nge bumba, ni Nte sha kwa Yehova sheka ishakeene ukunakila abena Nazi.” Amakana yabikilwe mu cifungo, Profesa Weiss atwalilila ukuti, “lelo Inte iili yonse iyatuminwe ku nkambi ya kucushiwilwamo nga yalilubwilwe ukupitila fye mu kusaina icipepala ica kulekulukamo icitetekelo cakwe.”

Ukulosha kuli bumpomfu bwa Nte sha kwa Yehova, Profesa Weiss asoselo kuti: “Ica kumwenako cabo cilangilila ukushangila kwabo ukwaibela na maka ya bumpalume yantu ubuKristu bwa kale bwakwete ilyo tabulapampamikwa ukube mipepele ya mu bwikashi no kutendeko kubombela ubwikashi na muli fyo ukunasha ukufwaisha kwa kwikala ubumi bwa bumpomfu. Nga fintu pasita wa baProtestanti alembele pa lwa bene, ‘Te macalici yakalamba, lelo ni aba bantu abapeelwa imilandu ya bufi kabili abapumiiwa e bashangile ukulwisha ubukali bwa ciwa ca ciNazi, kabili abapamine ukulwisha ukulingana ne citetekelo cabo.’”