Ni Pa Malayo ya kwa Ani Mwingashintilila?
MU 1893, ibumba lya bantu 74 abalanda pa mibele ya mu bwikashi lyakumene ku Bulangisho bwa Calo conse ku Chicago ku kulanshanya pa lwa nshita ya ku ntanshi. (Ici cifulo e cilangilwe pa muulu.) Ukulolesha ku ntanshi ku myaka 100 ukufika mu 1993, balisobelepo ifintu fimo pamo nge fi: “Abantu abengi bakekala imyaka 150.” “Ififungo fikacepa kabili ukulekana kukamonwa ngo kushakabilwa.” “Ukuteka kukabo kwayanguka nga nshi, ico ukukula kwine kwine lyonse kulangushako ifintu.”
Mu kupalako, mu 1967 icitabo ica mutwe wa kuti The Year 2000 casobele ukuti: “Ukufika mu mwaka wa 2000, cimoneko kuti bakompyuta bakalingana no muntu, ukupashanya, nelyo ukucishapo pa kulamuka kumo ukwa ‘buntu,’ nalimo ukusanshako na mano yakwe yamo ayakutesekesho kuyemba na ya kutukuta.” “Itontonkanyo ilya kuti amaroboti ayashakosesha mutengo yakabombe ncito ishingi isha mu ng’anda . . . limoneka ilyabamo ukupelulula nga nshi ukufika mu mwaka wa 2000.”
Ukufilwa kwa bantu ukumwena libela ifya ku ntanshi kwalipusana apakalamba ku maka yantu Lesa akwata. Ku ca kumwenako, linganyeni ukusobela kulumbwilwe pa muulu na fintu Baibolo yasobele mupepi ne myaka 2000 iyapitapo ukulosha ku kasuba kesu: “Abantu bakaba abaitemwa, abatemwe ndalama, aba mataki, aba miiya, aba miponto, aba bucintomfwa ku bafyashi, abashitootela, abashashila, abaumalala, abatalama, aba lwambo, ababulo kuiteka, abankalwe; bakaba abashatemwa busuma, bashikamfutu, bacintalika, abatuumikwa, abatemwo kwangala ukucisho kutemwa Lesa; abantu abakwate mimonekele ya bukapepa, lelo abakaana amaka ya buko.”—2 Timote 3:1-5.
Ubu busesemo bwa Baibolo pa lwa “nshiku sha kulekelesha” bwaba ni bumo fye pa yengi ayafikilishiwa mu nshiku shesu. Icebo ca kwa Lesa casobele ukuti “icishibilo” ca kubapo kwa kwa Yesu cikasanshamo inkondo ya calo, ifipowe, ifikuko, ifinkukuma, no kushimikilwa kwa mbila nsuma iya Bufumu bwa kwa Lesa icalo conse.—Mateo 24:3-14; Luka 21:11.
Ukulungika kwa malayo ya kwa Lesa ukushiluba kwakuntile kalemba umo uwa Baibolo imyanda ya myaka iyapitapo ukubilisho kuti: “Takwashala nangu cimo ca mu fintu fyonse fisuma ifyo Yehova Lesa wenu asosele ulwa imwe; fyonse fyalimoneke kuli imwe, takwashala cintu nangu cimo.”—Yoshua 23:14.
Ee, kuti twashininkisho kuti amalayo yonse aya kwa Lesa mu kwangufyanya yakafikilishiwa. Ubufumu bwa kwa Lesa bukapwisho kulwala, bumpulamafunde, ukubomfye miti ikola, insala, ne nkondo—isonde lyonse likaba paradise. (Ilumbo 37:10, 11, 29; Ukusokolola 21:3, 4) Kuti mwaenekela ubu busesemo ukufikilishiwa! Bwafuma kuli Kabumba wesu, “uushibepa.”—Tito 1:2; linganyeniko AbaHebere 6:13-19.
[Abatusuminishe Ukubomfya Icikope pe bula 32]
Cleveland State University Archive