Ilyashi lya Bakabilisha ba Bufumu

Ukushipikisha Kwatungulula kwi Paalo lya kwa Lesa mu Malawi

YOSEFE ali mubomfi wa busumino uwa kwa Yehova. (AbaHebere 11:22) Kabili ali mwaume uwashipikishe icine cine. Nangula ca kuti alifutwikwe kuli bamunyina, ukushitishiwa mu busha imiku ibili, kabili ukupooswa mu cifungo pa milandu ya bufi, Yosefe tatompweke. Ukucila, alishipikishe imyaka ya bucushi mu kutekanya, ukulolele paalo lya kwa Yehova mu kuicefya.—Ukutendeka 37:23-28, 36; 39:11-20.

Mu kupalako ilelo, Inte sha kwa Yehova mu Malawi shalilolele paalo lya kwa Lesa mu kutekanya. Ishi Nte sha Bwina Kristu shalishipikishe ifibindo fya buteko, ukukaanya kwabipisha, no bunkalwe bumbi pa myaka 26. Lelo balilambulwa pa kushipikisha kwabo!

Lintu ukupakasa kwatendeke mu Malawi ku kupwa kwa 1967, mwali bakasabankanya ba Bufumu mupepi na 18,000. Citontonkanyeni ubuseko Inte shakwete lintu shaumfwile ukuti umwaka wa mulimo uwa 1997 wakwete icipimo cipya ica bakasabankanya 38,393—ukucila pa miku ibili lintu icibindo catendeke! Mu kulundapo, abasangilwe ku Mabungano ya Citungu 13 aya “Inkombe sha Mutende wa Bukapepa” ayaliko mu Malawi balicilile pali 117,000. Cine cine, Yehova alipaala icitetekelo cabo no kushipikisha.

Ica kumwenako ca ili ipaalo cili ca kukumanya ca mulumendo uwe shina lya Machaka. Lintu Machaka asumine ukusambilila Baibolo ne Nte sha kwa Yehova, abafyashi bakwe balikalipe cibi. Batile: “Nga ulefwaya ukuba Nte, ukafume pano pa ng’anda.” Nangu cibe fyo, uku kutiinya takwamufuupwile ukuleka ukusambilila. Pa mulandu wa ici, abafyashi bakwe balimupokele fya kufwala fyakwe fyonse. Bamunyina balyankwileko no kumushitila ifya kufwala na fimbi. Lintu abafyashi ba kwa Machaka baumfwile ci, bamwebele ukuti: “Nga ba Nte e bakulakushitila ifintu, ufume pano ukaleikala nabo.” Pa numa ya kutontonkanyapo mu kusakamanishisha, Machaka alifuminepo, kabili ulupwa lwa Nte mu cilonganino alelongana lwatendeke ukwikala nankwe.

Abafyashi ba kwa Machaka balifulilwe nga nshi ica kuti bapingwilepo ukukuukila kumbi pa kuti bengasengauke Nte. Kwena, ici conse calengele Machaka ukumanama, lelo alisansamushiwe lintu bamunyina balanshenye nankwe Ilumbo 27:10 ilitila: “Ilyo tata na mayo bandekelesha, e lyo Yehova ambuula.”

Mu kupita kwa nshita, abafyashi ba kwa Machaka balibweseshemo umutima, kabili apingwilepo ukubwelelamo pa ng’anda. Cilemoneke fyo, umupampamina wa mwana wabo uwa kubombela Yehova walibakuntile ku mutima nga nshi pantu nabo balefwaye sambililo lya Baibolo ne Nte sha kwa Yehova! Balisangilwe fye na kwi Bungano lya Citungu ilya “Inkombe sha Mutende wa Bukapepa” pa nshiku shonse shitatu, ica kuti pa numa baliseshiwe ukusosa ukuti: “Cine cine, uku e kuteyanya kwa kwa Lesa.”

Ca cine, ukukaanya kuti kwaba bwesho icine cine lelo inkombe sha cishinka isha kwa Lesa tashitompoka. Mu kushipa shilaya ku ntanshi, ukwishibo kuti “ubucushi bucito kushipikisha, no kushipikisha kucite mibele ya cishinka.” (Abena Roma 5:3, 4) Inte sha kwa Yehova mu Malawi kuti shasumina bucine bwa kuti ukushipikisha kutungulula kwi paalo lya kwa Lesa.