Ibungano lya “Kupapusha” Lyatashiwa

UULANDA pa mulabasa uwa ku Lima, Peru, aletwishika Inte sha kwa Yehova apakalamba. Nangu cibe fyo, pa numa ya kusangwa kuli limo ilya mabungano yabo, alyalwile imibele yakwe apakalamba. Na kuba, alisongelwe apakalamba ica kuti alandile ifyebo fya kutasha ku baleumfwa icilimba. Ifyakonkapo ni fimo ifya fyebo alandile:

“Lyali libungano lya kupapusha. Takwali ipepala nangu limo pa nshi nangu bakashitisha. Takwali bamotoka abalecilika umusebo. Abantu 5,200 baile ku cibansa ukubomfya indalama shabo, cila muntu alikwete imbeketi, icisalu, ica kukuntilako ulukungu, ica kukushilapo ulukungu, icipyango, bulasho munono, amakalapushi, na sopo wa kuwamishako no kukuushilako icifulo. Apalekabila ukupentwa, balepentapo. Kabili ni kwi indalama shafumine? Balasangwilako abene beka! Lintu baishiba ukuti kulekabilwa fimo, baba abaiteyanya ukufumya indalama shabo. Mu cine cine, Icalici lya ciKatolika talyapoosako amano ku fya musango yu. Ndetasha Inte sha kwa Yehova na bakateyanya ba kulongana kwa musango yu. Kabili ukufuma pa nshi ya mutima wandi ndetila kuli bene, Shi Lesa alemwaafwa no kumupaala.”

Uno mwaka, mu misumba iya mwi sonde lyonse, Inte sha kwa Yehova shikaipakishe Bungano lya Citungu ilya “Imikalile ya Bukapepa.” Bushe mukabako?

[Amashiwi pe bula 32]

“Takwali ipepala nangu limo pa nshi”