Imyendele Isuma Ileta Ilumbo

NYUNSHIPEPALA ya ku Italy iya La Gazzetta del Mezzogiorno yatashishe Inte sha kwa Yehova pa kusabankanya icipande ca “Matera—City of Unique Cave Dwellings.” Ici cipande cali muli Loleni! wa July 8, 1997, mu ciNgeleshi uwaananishiwe mu ndimi ishingi. Loleni! pali nomba ilepilibulwa mu ndimi 81 kabili amakope amamilioni 19 e yananishiwa mwi sonde lyonse. Nyunshipepala yatile Loleni! e yacililepo muli iyi nshita ya lusuba “ukulosha ku kusabankanya kwa kusumbula ilyashi lya kale no bupyani bwa musumba [wa Matera].”

Inyunshipepala yatashishe baNte ukulosha kwi Bungano lya Citungu ilya “Tetekeleni Icebo ca kwa Lesa” ilyali mu Matera mu 1997. Icipande casosele ukuti baNte balikumanishe “ukuleta abantu 4,000 ku cibansa ca XXI Settembre Stadium [ica mu musumba] pa kati ka nshita ya lusuba ninshi akasuba nakakalipa; baliwamya no kubikako ifintu ifipya ku cifulo ca fyangalo (na kucilisha ifimbusu) no kupenta cipya cipya apa fye, bene baishitile ifyo balekabila ukubomfya.”

Inte sha kwa Yehova shitukusha ukuba bwino ku bena mupalamano. (Mateo 22:37-39) Na kabili shikonka ukufunda kwa Malembo ukwa kuti: “Mwende bwino mu Bena fyalo; ukuti . . . bacindike Lesa mu bushiku bwa cipempu pa kuloleshe milimo yenu isuma.”—1 Petro 2:12.