“Mwaba Fintu Lesa Afwaya Ukuti Tube”

NGA Bena Kristu baleumfwana na balashi ba calo “pa mulandu wa kwa Shikulu,” kuti baenekela ‘ukutashiwa nga bacite cisuma.’ (1 Petro 2:13-15) Inshita yapitapo, Inte sha kwa Yehova mu South Africa balicikumenye pe bungano lya citungu ilyabelele mu cikuulwa ca pa koleji.

Ubushiku bwa kubalilapo ubwe bungano, bakapokola ba pa koleji baliisusunkenye nga lyonse ukwenekela ukuti abalesangwako baba abakalipa kabili abaafya nge fyo bamona ku mabungano ya bambi. Nangu cibe fyo, apo tabatalile ababomba ne Nte sha kwa Yehova, baali no kupapushiwa!

Bakapokola balepikita motoka iili yonse iyaleingila no kufuma pa mpongolo nge fyo bacita lyonse. Balipapushiwe pa kumona bonse bali aba bucibusa, abatekanya, kabili aba mucinshi, nangu cingatila ukupikita kwalecelesha abalesangwako. Takwali uwalesuusha, ukupaasha, nelyo ukuponta nga lyonse. Kapokola umo atile: “Mwalipusanako na bambi abesa. Imwe mwalipetama kabili aba mucinshi ifyo bonse tuleimwena na menso.”

Lintu umukalamba wa bakapokola aumfwile pa busuma bwa Nte sha kwa Yehova, apingwile ukukanalapikita bamotoka ati, “pantu mwalikanshiwa bwino sana.” E ico, bamotoka bakambatikwe ne filembo fya “JW” [Inte sha kwa Yehova] baleingila fye ukwabulo kupikitwa.

Pa mpela ye bungano, umukalamba wa bakapokola atile kuti atemwa ukumona Inte shabwela na kabili bwangu. Atile: “Tatwamonapo abantu baicindika ifi. Mwaba fintu Lesa afwaya ukuti tube.” Uko kutashiwa kulundapo kukoselesha Abena Kristu ba cine ‘ukwenda bwino,’ pa kuti abantu ‘bacindike Lesa pa kuloleshe milimo yabo isuma.’—1 Petro 2:12.