Ubuteko bwa Cikaya Bwatasha Inte sha kwa Yehova

MU Cádiz, ku Spain, umusumba wakwata icabu uwaba amakilomita 500 ukufuma pa kati ka masamba na kapinda ka ku kulyo aka Madrid, mayor Doña Teófila Martínez apeele icipampa (icili pa muulu) Inte sha kwa Yehova. Cisosa ukuti: “Ubuteko bwa cikaya ubwa mu musumba wa Cádiz buletasha Inte sha kwa Yehova pa kubombesha kwabo na pa kubomba na bambi mu kubombelako uyu musumba.” Cinshi Inte shacitile pa kutashiwa muli uyu musango?

Capeelwe pa mulandu wa mulimo Inte shabombele mu kuwamya icibansa ca buteko ica ulya musumba. Pa mpela ya milungu iingi, iminshipendwa ya Nte baliipeeleshe ukwafwako ukuwamya ifimbusu fya pa ntunti ya kubalilapo iya cibansa ca mupila ica Carranza. Nomba bonse ababomfya cilya cibansa balamwenamo mu mipaipi ya menshi na pa nshi apawamishiwa.

Ni kale Inte sha kwa Yehova shatendeke ukumfwana no buteko bwa cikaya ubwa mu musumba wa Cádiz. Cila mwaka, ubuteko bwa cikaya ubwa muli ulya musumba bulashimisha Icibansa ca Carranza ku Nte ilyo bakwete ibungano lya citungu ilya cila mwaka. E co, Inte shalaba isha nsansa ukucita apo shingapesha mu kulenga cilya cibansa cileba icisuma lyonse.

Lelo, ukulunda pa milimo ya ku mubili babomba limo limo Inte sha kwa Yehova lyonse shitandalila aba mu musumba ku kwaafwa icintubwingi mu nshila imbi. Babila “imbila nsuma” iya Bufumu bwa kwa Lesa. Kwena, tababomba mu butumikishi bwa cintubwingi pa kuti batashiwe ku bantu. Bacite co mu kumfwila ikambisho lya kwa Yesu ilya kushimikila “imbila nsuma iyi ya bufumu” no “kulenga aba nko shonse ukuba abasambi.” (Mateo 24:14; 28:19) Muli iyi nshila, Inte sha kwa Yehova shisubila ukubombela ubwikashi ukupitila mu kusambilisha abantu “umuyo bulungami.”—Amapinda 12:28.