Bushe Umutende mu Calo Conse Ukafuma Kwi?

BUSHE ukusambilisha abantu amasomo yamo yene mu calo conse no kupanga icalici limo, e fikaleta umutende mu calo conse? E fyaletontonkanya incenshi Robert Muller, uwali kale inkonkani kuli kalemba mukalamba mu cisaka ca United Nations, uwapokele icilambu ca pa mwaka mu 1989 ica UNESCO Prize for Peace Education. Inyunshipepala ya The Vancouver Sun yatile, incenshi baMuller “batile abana be sukulu bonse mu calo bafwile balesambilila amasomo yamo yene pa lwe sonde, abantunse, no kuleka ulukaakala.” Alefwaisha ukumona ubushiku lintu amasukulu yonse mu calo yakalasambilisha abana ukuti UN e subilo lyawamisha ilikaleta umutende. Inyunshipepala ya Sun kabili yatile incenshi ileti “imipepele yonse pe sonde ifwile ukumanakapi no kupanga Ukupepa Kwaikatana, nga filya icisaka ca UN caba.” Lyena, “bakapepa bonse bakulasambilisha ukuleka ulukaakala.”

Bushe umutende mu calo conse cine cine ukabako? Ukwabula no kutwishika! Nomba tawakese ukupitila mu kumanakapi kwa bantunse abali bonse. Ukucila imyaka 2,700 iyapitapo, kalemba wapuutwamo alandile pa ntulo yasumbuka iingasambilisha abantu umutende, lintu asobele ukuti aba mitima ya bufumacumi ‘bakasambilishiwa kuli Yehova’ kabili umutende wabo “ukafula.”—Esaya 54:13.

Baibolo itila “Lesa wa mutende.” (Abena Roma 16:20) Na lelo, umulimo wa kusambilisha uwa kusungusha mu calo conse ulebombwa, Yehova alesambilisha abantu bakwe ‘ukufwaya umutende no kuukonkelela,’ lyena ‘ukufula impanga shabo shibe ifya kuliminako umushili’ no ‘kukanasambilila kabili ubulwi.’—1 Petro 3:11; Esaya 2:2-4.

Ukupepa kwashimpwa pa cine, ukushabamo ubumbimunda no kufutika, e ko Lesa asuminisha no kupaala. (Mateo 15:7-9; Yohane 4:23, 24) Ukupepa kwa cine kweka fye, ukumfwana umupwilapo ne Cebo ca kwa Lesa, e kwingasangula abantu abengekala mu mutende no kwikatana kabili abatemwana icine cine.—Yohane 13:35.

Nga mulefwaya ukumfwilapo na fimbi ifyo Icebo ca kwa Lesa cilanda pa lwa mutende wa calo conse, kuti mwaipusha abasabankanya uno magazini.