Icintu Icawama Ukucila pa fya Kusubasuba

PA NUMA ya kulanda pa “fya kuikobaika” ifyo abanakashi balebomfya nge fya kubayemfya, umutumwa Petro afundile ukuti: “Lelo, ubusuma bwenu bulingile ukuba bwa mu kati, ubusuma bushipwa ubwa mutima wafuuka kabili uwatalala, uwabo wacindamisha ku cinso ca kwa Lesa.”—1 Petro 3:3, 4, Today’s English Version.

Kuti mwatemwa ukwishiba ukuti, lintu umutumwa alembele pa lwa kusaama kwa ku nse, abomfeshe ishiwi lya ciGriki koʹsmos, ukwafuma ne shiwi lya ciNgeleshi ilya “cosmetic,” ilipilibula “ukuyemfya maka maka umubili.” Bushe Petro alebinda abanakashi ba Bwina Kristu ukubomfya ifya kusubasuba nelyo ifya kuyemfya? Mu Cebo ca kwa Lesa tamwaba icilangilila ico. Lelo cisuminisha umuntu ukuisalilapo pali ci, e co imibomfeshe ya ifi fintu kuti yaba iyapusanapusana.

Lelo ifya kusubasuba nga fyacilamo, nelyo mwasuba ica kuti bambi bapumfyanishiwa, ninshi finshi mulelangilila? Bushe tamulelangilila icilulo, ukubulwa ubufuuke, nelyo ukukanaicindamika, ukufwaya ukuilanga, nelyo bukaitemwe? Cine cine kuti kwalenga umwanakashi amoneka ngo ushacindama napamo ukumoneka ngo wa mibele yabipa.—Linganyeniko Esekiele 23:36-42.

Pa mulandu wa ici, umwanakashi ‘uutila atiina Lesa’ nga ca kuti apingulapo ukubomfya ifya kusubasuba, akafwaya ukuleka icinso cakwe calangilila ukuti alitekanya, aba no kutemwa, kabili alifuuka. Imibele ya musango yu ikamuyemfya. Na kuba, namponga apingulapo ukubomfya ifya kusubasuba atemwa iyo, akalangilila umucinshi no kuyemba kwa mu kati. Ici cikalangilila ifyo aishiba ukuti kwaliba icawama ukucila pa fya kusubasuba nga fintu amashiwi ya kwa Petro ayambwilwe pa muulu yalangilila.—1 Timote 2:9, 10.