Ishina lya Bulesa Lyashimbulwa mu Israel
PA MYAKA iingi ubuYuda bwa cishilano bwalibinda abakonshi ba buko ukushimbule shina lya bulesa, Yehova. Ukulingana na Mishnah, uuli onse uushimbula ishina lya kwa Lesa “takabemo mu calo icileisa.”—Sanhedrin 10:1.a
Pa January 30, 1995, uwali rabi mukalamba uwa ba Sephardim mu Israel ashimbwile ishina lya bulesa ku mufulo. Acitile ici ilyo alepepa ipepo lya kulungika ilyo basungila ku mutwe ilya ba Cabala ilitwa tikkun. Ili pepo lipepwa pa kuti Lesa engabweseshako ukumfwana mu bubumbo, uko bakapepa batila kwalipumfyanishiwe ku maka ya bubifi. Inyunshipepala ya Yedioth Aharonoth, iya February 6, 1995, yatile: “Iyi ni mpupo ya maka yaibela ica kuti na mashiwi ya iko yasangwa fye mu katabo kaibela ako tabashitisha ku cintubwingi.” Batila ukulumbula ishina lya kwa Lesa muli iyi mpupo kulenga ukulomba kwabo kukwatileko amaka yaibela.
Lelo kwena, Baibolo ikambisha ababomfi ba kwa Lesa ukubomfya ishina lya bulesa, Yehova. (Ukufuma 3:15; Amapinda 18:10; Esaya 12:4; Sefania 3:9) Mu malembo ya ciHebere ca kale aya Baibolo, ilyo shina lyabamo imiku mupepi na 7,000. Nangu cibe fyo, Baibolo ilasoka pa lwa kubomfya bubi bubi ishina lya kwa Lesa. Ifunde lyalenga butatu pa Amafunde Ikumi litila: “Wilalumbula apa fye Ishina lya kwa Yehova Lesa obe; pantu Yehova takamulinge uwa kaele untu alumbula apa fye ishina lyakwe.” (Ukufuma 20:7) Ni shani fintu ishina lya kwa Lesa lingalumbulwa apa fye? Ukulandapo kwa The Jewish Publication Society kutila ishiwi lya ciHebere ilyapilibulwa ukuti “apa fye” kuti lyasanshamo ukulumbula ishina lya bulesa “icilumbulelumbule” no “kulumbula libili libili ipaalo ilishilekabilwa.”
E ico, ni shani tulingile ukumona ipepo lya kulungika ilya tikkun ilya ba Cabala? Ni kwi lyafumine? Muli ba 1100 C.E. na ba 1200 C.E., ubuYuda ubwasanshiwamo ne fipuuta, ubwitwa Cabala, bwatendeke ukulumbuka. Muli ba 1500, umu rabi Isaac Luria, aleteleko “tikkunim” mu mpupo sha ba Cabala. Ishina lya kwa Lesa lyalebomfiwa nge cipuuta icakwata amaka yaibela, kabili kwaishileingila mu mpupo sha ba Cabala. Bushe kuti mwatila uku kwali kubomfya kwalinga ukwe shina lya kwa Lesa?—Amalango 18:10-12.
Te mulandu na fintu mwingasuka ico cipusho, kuti mwasumino kuti cali cintu icaibela sana ukulumbula pa lwalaala ishina lya kwa Lesa mu Israel wa ndakai. Lelo, Lesa umwine asobele ukuti: “Muli ubo bushiku, [mukatila]: Tooteleni Yehova, lilileni kwi shina lyakwe, lengeni abantu na bantu ukwishibe milimo yakwe, lengeni ukwibukisho kuti ishina lyakwe lyalisansuka. Lumbeni Yehova, pantu acite fya kupulama; lekeni ici ciishibikwe pano isonde ponse.”—Esaya 12:4, 5.
Ku ca nsansa, mu Israel, ne fyalo ukucila pali 230 mwi sonde lyonse, Inte sha kwa Yehova shilebombesha ku kwafwilisha abanabo ukwishiba Yehova mu nshila yalungika. Shisubilo kuti na bambi abengi bakatesekesho bupilibulo bwa malembo pamo nga Amalumbo 91:14 apo Yehova atila: “Ico ankondela, e co ndemupokolwela; ndemusansula, ico aishibe shina lyandi.”
[Futunoti]
a Mishnah libuuku umwaba ukulandapo ukusailisha ifunde lya mu Malembo, ilyashimpwa pa bulondoloshi bwa ba rabi ubwitwa Tannaim (bakafundisha). Lyalembelwe ku mpela ya mwanda wa myaka uwalenga ibili no walenga itatu C.E.
[Icikope pe bula 28]
Mu Negeb, abantu ba kwa Yehova balelenga ishina lyakwe ne Cebo cakwe ukwishibwa
[Icikope pe bula 29]
Icipampa icalembwapo ishina lya bulesa