Akapaatulula ka Mushobo ne Mipepele

ILYO Mark Mathabane, kalemba wa malyashi uwafyalilwe ku South Afrika aipushiwe na magazini ya Time, ayaswike ati: “Lintu naishile ku Amerika mu 1978, namwene kwati icalo ca Amerika calipwisha kale amafya ya kapaatulula ka mushobo, no kuti abafiita balilingana na bekashi bonse. Mu nshila ishingi, nacisangile ukuba ica cine. Icalo ca Amerika camoneke kwati calicilile sana icalo ca South Afrika. Lyene, ku ca kupapa, nasangile ukuti imitima ya bantu tayaaluka sana.” Cinshi asangile icamupapwishe muli uyo musango?

Mathabane atila: “Inshita ya musoobolola wacilapo mu Amerika ni 11:00 hrs. pa Mulungu.” Amwene ukuti na mu calici, abantu tabafwaya ukupepela pamo na bantu aba mushobo umbi. Aipwishe ati: “Ni shani fintu bamona imishobo imbi mu nshiku shimbi isha mu mulungu?” Pa kukoselesha amasomo nge cingaalula abantu, Mathabane atile: “Amasomo kuti yatulengo kusumina ukuti abantunse bonse balilingana.”

Inte sha kwa Yehova balisumino kuti amasomo kuti yapwisha ubu bwafya, lelo maka maka bakoselesha amasomo yashimpwa pa Cebo ca kwa Lesa. Ca cine, Baibolo ilabaafwa ukucimfya ulupato lwa mushobo, nangu fye ni mu fyalo umo imitundu yapatana. Cila mulungu mu Mayanda yabo aya Bufumu, aba mishobo yalekanalekana na ba nko balalongana pamo ku kusambilishiwa amafunde ne fishinte fya Cebo ca kwa Lesa, Baibolo. Tabasonkesha indalama pali uku kulongana. Tulemulaalika ukwisalonganako!