“Namwalula Ifyo Nalemona Inte Sha Kwa Yehova”

IFI e fyo umulashi wa cifungo umwina Poland alandile pa cipande icalembelwe pa lwa Nte sha kwa Yehova, nga fintu calandwapo mu Ulupungu lwa kwa Kalinda ulwa October 15, 1998. Ici cipande caleti, “Ababa ne Mitima Yakosa Nga Mabwe Batendeka Ukumfwa,” calondolwele ukutunguluka kwa Nte sha kwa Yehova mu kubomba na bafungwa ba ku Wołów, mu Poland.

Ilyo Ulupungu lwa kwa Kalinda ululumbwilwe pa muulu lushilasabankanishiwa ku cintubwingi, ukukumana kwaibela kwaliteyanishiwe pa September 13, 1998 pa cifungo ca Wołów pa kuti abafungwa bengapeelwako ulu Ulupungu. Pa balaalikwe ukusangwako pali ne Nte ishabatishiwa ishaleikala muli iyo ncende kumo na bafungwa bambi abalefwaisha ukusambilila icine, na balashi bafulilako aba cifungo. Amashiwi yakonkapo e yamo ayo abasangilweko balandilepo.

Jerzy, umo uwa Nte sha kwa Yehova uwabatishiwilwe mu cifungo ukucila pa myaka 5 iyapitapo, atile: “Ndi uwa nsansa nga nshi, pantu nomba ilelo kuti nabelenga pa fyo bamunyina ukufuma mu filonganino fya mupepi babombeshe na maka ku kutwafwilisha.” Alundilepo ukuti: “Ndesha lyonse ukuwamyako ubuntu bwandi, kabili ndemona ifyo Yehova aamumunga pa nshita yonse yi.”

Umufungwa na umbi, uwe shina lya Zdzisław, alandile pa lwa mulimo wa kushimikila mu cifungo ukuti: “Pali nomba, abafungwa bane baleipekanya ukubatishiwa, kabili abapya abalefwaisha ukusambilila icine baletwalilila ukusangwa ku kulongana pa cikuulwa tulonganinamo. Cino cipande ca kututuninkisha ica maka nga nshi mu kutwala pa ntanshi umulimo muli cino cifulo twikala.” Mwandi uyu mupampamina usuma, maka maka apo Zdzisław acili nakwata imyaka 19 iya kubombela icifungo!

Pa numa ya kubelenga ici cipande calelanda pa cifungo ca Wołów umulashi umo uwa cifungo atile: “Mwandi natucindamikwa mu nshila yaibela. Nshabalile ntontonkanya ukuti amashiwi yasuma nga ya kuti yasabankanishiwa pa lwa cino cifungo mu ndimi 130 mu calo conse. Nalimutemwa imwe mwe bantu, kabili ndatasha ukubombesha kwenu mu kwaafwilisha abafungwa.” Umulashi na umbi alundilepo ukuti: “Namwalula ifyo nalemona Inte sha kwa Yehova. Kale, nalemona imipepele yenu nge ya bankosamitwe. Nomba ninjishiba ukuti muli bantu abakonka ifishinte.”

Umukalamba wa cifungo ca Wołów, Marek Gajos, alimwentwile no kusoso kuti: “Pa kubala twaletontonkanya ukuti tukamona uko amatukuto yabo yakabapesha. Twalemona kwati imipepele yenu ya bantu abalesabaila fye ifya kusabaila pa kuti bawamye fye imisango ya bafungwa ukupitila muli Baibolo. Nangu cibe fyo, ilyo twamwene ifyafumine mu mulimo mwatendekelepo ukubomba, twapingwilepo ukuti tulebombela pamo mu kupalamisha. Nomba imyaka 9 naisuka naikumana ukutula apo mwatendekela ukwisa pano ukwabula ukunenuka, e co ndemutasha apakalamba pali fyonse ifyo mwacita ukufika pali ino nshita.”

Nangu cibe fyo, ni shani fintu abafungwa bonse mu cinkumbawile aba mu cifungo ca Wołów bayankwileko kuli ici cipande ca mu Ulupungu lwa kwa Kalinda? Abali mu cifungo balefwaisha nga nshi ukusambilila icine ica kuti Inte ishali mu cifungo shalishalike bamagazini bonse bantu shakwete. Nangu fye balashi ba mu cifungo balangishe ukuti balefwaisha ukusambilila lintu balombele bamagazini ba Ulupungu lwa kwa Kalinda abalundwapo 40. Apo abalefwaisha baleya balefula, ifilonganino fyali mupepi fyalyafwilisheko no kupayanishisha bamunyina abali mu cifungo bamagazini ba Ulupungu lwa kwa Kalinda abalundwapo 100. Ukulundapo, impendwa ya balesangwa ku kulongana pali ici cifungo yalikulileko.

Piotr Choduń, umulashi wa cifungo uwabombela pamo ne Nte sha kwa Yehova mu kupalamisha, atile: “Twapingwilepo ukuti ici cipande cilangishiwe palya balangishisha ifipe muli cino cifungo cesu. Tulesubila ukuti abafungwa bonse abashilatendeka ukusambilila Baibolo na imwe bakabelenga uyu magazini.”

Ica kumwenako cisuma ica Nte no kubombesha kwabo ukwa mupampamina mu kushimikila filetwalilila ukuletako ifisuma. Ukulunda pa bafungwa 15 abalunduluka ukufika na ku kubatishiwa, kuli na balashi ba cifungo babili abaipeela kuli Yehova kabili umulashi na umbi uwa cifungo alilomba isambililo lya Baibolo. Kwena, bamunyina bonse abashimikila mu cifungo ca Wołów batasha Yehova Lesa pa kutunguluka kwabo.—Linganyeniko 1 Abena Korinti 3:6, 7.

[Icikope pe bula 28]

Inte shitatu pamo no mufungwa shiletambika magazini pa cikulwa ca kusambililamo ica cifungo