“Abakoshiwa ku Citetekelo”

MU MWAKA wa 1998, ilyo Inte sha kwa Yehova shalelengululwa sana, ibuuku lya ciFrench ilyaleti Les Témoins de Jéhovah face à Hitler (Inte sha kwa Yehova mu Nshita ya kwa Hitler) ilyalembelwe na Guy Canonici lyalisabankanishiwe. Muli ili buuku, amashiwi ya kubalilapo ayalembelwe na François Bédarida, uwasoma ifyacitike kale umwina France kabili shimucindikwa yaleti: “Ili buuku lisuma sana. Te pa mulandu fye wa kuti tulafwaya amabuuku ukulembwa ayengi, lelo ni pa mulandu wa kuti lyasabankanishiwa fye pa nshita yalinga. . . . Nga kufumyako incenshi, nani umbi engeshiba ubucushi Inte sha kwa Yehova bapitilemo pa nshita ya kwa Hitler? Pa myaka 12 iyo Hitler atekele, balipakeswe no kucushiwa nga nshi. Balibikilwe na mu nkambi sha kucushiwilwamo umo baculile icine cine. Icitetekelo cabo na fintu basuminemo e fyalengele ukuti bacushiwe umusango uyu. Mulandu nshi aba Bena Kristu bashibalumbwila mu lyashi lya kale? . . .

“Mulandu nshi kwabelele ukupakasa kwatapata ku bantu abanono, abaikala fye patali patali, kabili bakapepa bashaba na fyongo? Ico e cintu abantu bengafwaya ukwishiba. Pa mamilioni 60 abekashi ba mu Germany, 20,000 e baali Inte sha kwa Yehova, abantu ba mutende, abalekonka amafunde kabili abashaletiinya nelyo umo, bena ico balefwaya fye kubombesha no kukusha bwino abana babo. . . .

“Ubu bwesho bwaishile pa bantu ba mupampamina kabili bakacimfya ba bulwi bwa ku mupashi ukubomfya fye icitetekelo cabo muli Yesu Kristu, bacimfishe ukukandwa kuli bakapokola nelyo fye ukwipaiwa.”

Ilyashi lilanda pa lwa Nte sha kwa Yehova ukwipaiwa pa mulandu wa cisumino cabo nga Bena Kristu lya maka icine cine. Ukulanda pe buuku limo line, inyunshipepala yalumbuka sana iilembwa na Bakatolika ku France, La Croix, yalandilepo kuti: “Ifishinka fyonse ifyaishibikwa pa lwa Nte sha kwa Yehova, Guy Canonici nalonganika no kuletako bushininkisho bwakosa ica kuti takuli uwingakwata ne ca kusosa nga abelenga pa fyo bakoshiwe ku citetekelo pantu ena alemba fye mu kumfwika ukuti, icitetekelo e calengele ukuti batwalilile abakosa ukufika na ku mpela nangu fye bana abanono na bo bene lumo lwine. Tufwile ukulaibukishe ci na kucilisha pali ndakai ilyo tulelanda pa kufwaya ukwishiba nga ca kuti Inte sha kwa Yehova Bena Kristu ba cine cine.”