Kuti Mwaishiba Ifya ku Ntanshi!

Abantu abengi balatontonkanyapo sana pa fya ku ntanshi. Balitemwa ukupekanishisha libela, ukubomfya bwino indalama, no kuyumfwa abacingililwa. Lelo bushe kwaliba inshila iili yonse iyo twingeshibilamo ifya ku ntanshi?

PA KUFWAYA ukwishiba ifya ku ntanshi, abantunse balibomfya inshila shalekanalekana. Basayantisiti basambilila ifya bwikashi ne fya ku ntanshi, baceeceeta ifilecitika no kusobela fimo ukushintilila pali ifi fine. Abasambilila ifya bunonshi na bo bacita cimo cine mu mulimo wabo. Abapendule ntanda na bakabuka bashintilila pa fya kulengwilako inshita ya ku ntanshi; babomfya utubwebwe uto beta ukuti crystal balls pa kusobela, e lyo ne fya kupandapanda, kabili bengi babakonka. Ku ca kumwenako, Nostradamus, umwina France uwalependule ntanda alitwalilila ukuba uwalumbuka, nangu cingati imyaka iingi naipitapo ukutula apo afwilile.

Bonse aba abaitunga ukuba bakasesema babasanga nga bashingashintililwapo kabili baleta fye insoni. Mulandu nshi? Pantu basuula Yehova Lesa ne Cebo cakwe, Baibolo. E mulandu wine bafililwa ukwasuka ifipusho fyacindama pamo nge fya kuti: ‘Mulandu nshi ningashininkishisha ukuti ifintu fyasobelwa mu Baibolo fikacitika? Fyumfwana shani ne mifwaile Lesa akwatila abantunse? Ni shani fintu ine no lupwa lwandi twingamwenamo muli uku kusesema?’ Baibolo ilasuka ifi fipusho.

Ukusesema kwa mu Baibolo kwaliwamapo mu nshila ishingi na shimbi. Ukupusana no kusobela kwa bakalengula ba ntanda, kulalenga umo ukuisalila. E co, takuli uwalingilwa kabela. (Amalango 30:19) Ifyalembwa pamo nge fya kwa Nostradamus tafisambilisha ifili fyonse, lelo fyakwata ubulondoloshi bushumfwika kabili ubucincimusha. Lelo kuti twasambililako fimo ku kusesema kwa mu Baibolo. Kulondolola umulandu Lesa akacitila ifyo afwaya. (2 Imilandu 36:15) Kabili ukusesema kwa kwa Yehova takufilwa, pantu ‘Lesa tabepa.’ (Tito 1:2) E co, mu mikalile yabo abantu abatungululwa ku Cebo ca kwa Lesa baleshiba ifishinka, balaba ne mifwaile, kabili balaba aba nsansa ukwabula ukonaula inshita yabo iya mutengo ne fikwatwa mu fintu fya fye.—Amalumbo 25:12, 13.

Ifi fishinka ne fingi na fimbi fyalilandwapo pa Mabungano ya Citungu aya “Icebo ca kusesema ica kwa Lesa” aya Nte sha kwa Yehova aya mwi sonde lyonse aya 1999/2000. Amalyashi, ukwipusha, ifilangililo, ne cilangililo ca mu Baibolo fyalilenga abantu ukumona ubupyani bwa ku mupashi ubushaiwamina ubo abasambilila no kukonka icebo ca kwa Lesa ica kusesema bakwata. Icipande cikonkelepo calapituluka mu fishinka fikalamba ifya kucincimusha fimo fimo ifye bungano.