Bushe Abantunse Ni Nama Fye Ishacenjelesesha?
“Bushe cintu twasumina pa lwa ntendekelo ya bumi calicindama nga nshi?”
Umukashana wa myaka 16 uwa ku Brazil, aipwishe ici cipusho pa ntendekelo ya lyashi lyakwe ilyakwete umutwe uwaleti, “Bushe Abantunse Ni Nama fye Ishacenjelesesha?” Kafundisha wakwe aipwishe uyu musambi ukulanda ilyashi mu kalasi pali ici cipusho, lintu apokelele magazini wa Loleni! uwa July 8, 1998, umwali icipande calandile pali ilyo line lyashi.
Uyu Nte wacaice alandile pa busanso bwaba mu cisambilisho ca kusanguka icashimpwa pa mfundo ya kuti wafwa wafwa washala washala. Ku ca kumwenako, abengi batontonkanya ukuti imfundo ya kusanguka e yalenga bamo ukulamona inkondo ukuti lubali lwa cifyalilwa fye ulwa kale na kale ulwa kufwaisha ukuba aba mweo, icalengele no kuti utubungwe twa Fascism no twa buNazi tupangwe.
Uyu mwana we sukulu atile paliba ubupusano ubukalamba pa nama na bantu. Atile: “Bantu fye e bengalundulula bumupashi. Bantu fye e bafwaya ukusanga ubupilibulo ne mifwaile ya bumi. Bantu fye e basakamikwa pa lwa mfwa, e bayangwako ku ntendekelo yabo, kabili e bafwaisha ukwikala kuli pe na pe. Fintu cacindama ukuti tusangeko inshita ya kwishibilapo na fimbi pa lwa ntendekelo yesu!”
Kafundisha alitashishe ifyebo fyakwe ifisuma. Atile icalengele ukuti uyu uwacaice acite bwino ni co alitemwa ukubelenga. Pa sukulu uyu mukashana aishibikwa ngo watemwa sana ukubelenga impapulo shashimpwa pali Baibolo pamo nga Loleni! na Ulupungu lwa kwa Kalinda.
Inte sha kwa Yehova shalyangwako sana pa fyo icifundisho ca kusanguka cayambukila imitima ne mintontonkanyo ya bacaice. Pali uyu mulandu, icilonganino cabamo uyu mukashana cakoseleshe Inte shonse ishacaice ukupeela ba kafundisha babo magazini wa Loleni! wa July 8, 1998. Bamagazini mupepi na 230 balipeelwe mu masukulu yalekanalekana muli uyu musumba. Umukalamba wa Science Department pa sukulu limo alilembeshe ukulapokelela magazini wa Loleni!
Ca cine cintu twasumina pa lwa ntendekelo ya bumi calicindama! Uyu uwacaice na banankwe balilangilila ukuti ukusumina muli Kalenga kwalilenga ubumi bwabo ukuwaminako.