‘Nkashinguluke Ciipailo Cenu, mwe Yehova’

“NDESAMBE minwe yandi mu kaele, no kushinguluke ciipailo cenu, mwe Yehova.” (Amalumbo 26:6) Imfumu Davidi iya ku kale yalandile aya mashiwi pa kulangisha ukuipeelesha kwa iko kuli Yehova. Lelo, nangu cibe fyo, mulandu nshi ‘engashingulukile’ ciipailo ca kwa Yehova, kabili ni mu mano nshi?

Ifyacindamishe nga nshi mu kupepa kwa kwa Davidi fyali lihema e lyo ne ciipailo icapangiilwe no mukuba ice lambo, ico pa nshita ya kuteka kwakwe cabelele mu Gibeone, ku kapinda ka ku kuso mu Yerusalemu. (1 Ishamfumu 3:4) Ici ciipailo cakulile mupepi na basikweya mita 2.2, mu kupusanako ne ciipailo icakulishe nga nshi kabili ica lulumbi icali no kukuulwa mu mansa she tempele lya kwa Solomone.a Nalyo line, Davidi alebekelwa nga nshi mwi hema ne ciipailo ca liko, ifyali ifyaacindamisha mu kupepa kwa cine mu Israele.—Amalumbo 26:8.

Ifya kuninika fyaocewa, amalambo ya mutende, ne fya kuninika fya pa membu fyalecitilwa pa ciipailo, kabili pa Bushiku bwa Kukonsolwela cila mwaka kwaleba amalambo ayalepeelwa ku kukonsolwela imembu sha luko lwa kwa Israele. Iciipailo na malambo fyalikwata ubupilibulo ku Bena Kristu ilelo. Umutumwa Paulo alondolwele ukuti iciipailo caleimininako ukufwaya kwa kwa Lesa, kabili ukupitila muli cene e mo Apokelele ilambo lyalinga ilya kulubula abantu. Paulo atile: “Ni ku kufwaya uku e ko twashishiwa, mu kuti Yesu Kristu atuulile umubili wakwe limo epela.”—AbaHebere 10:5-10.

Ukulingana ne cibelesho cabo, bashimapepo lyonse balesamba ku minwe pa kutendeko kutumikila pa ciipailo. Kanshi cali icalinga ukuti Imfumu Davidi isambe minwe ya iko “mu kaele” ilyo ‘ishilashinguluke ciipailo.’ “Aendele, muli bumpomfu bwa mutima, na mu kutambalala.” (1 Ishamfumu 9:4) Nga tasambile minwe yakwe muli iyi nshila, e kutila “ukushinguluke ciipalo”—ukupepa kwakwe nga takwapokelelwe. Na cine, Davidi tali mwina Lebi kabili takwete shuko lya kubombako imilimo ya bushimapepo pa ciipailo. Nangu cingati ali ni mfumu, talesuminishiwa fye no kwingila mu lubansa lwe hema. Nalyo line, Davidi pamo ngo mwina Israele wa busumino, aleumfwila Amalango ya kwa Mose kabili libili libili aletwale fya kuninika ku ciipailo. Aleshinguluke ciipailo mu mano ya kuti icacindamishe mu bumi bwakwe cali kupepa kwa cine.

Bushe ifwe ilelo kuti twakonke ca kumwenako ca kwa Davidi? Ee. Na ifwe bene kuti twasambe minwe yesu mu kaele no kushinguluke ciipailo ca kwa Lesa nga twakwate citetekelo mwi lambo lya kwa Yesu, e lyo ne “minwe ya kaele, no mutima uwasanguluka,” ukubombela Yehova no mutima wesu onse.—Amalumbo 24:4.

[Futunoti]

[Icikope pe bula 23]

Iciipailo caleimininako ukufwaya kwa kwa Yehova, umo apokelela ilambo lyalinga ilya kulubula abantunse