Nani Akafumyapo Ulukaakala?

MU September 1999, Kofi Annan, Kalemba Mukalamba uwa mu kabungwe ka United Nations apokelele abaishile mu kusangwa ku kukumana kwalenga 54 ukwa pa mwaka ukwa Cisaka Cikalamba. Nga fintu cashimikwe mu nyunshipepala ya The Toronto Star, aebele bakateka ba calo ukuti: “Kuli abantu abengi nga nshi abalekabila ifyacila pa fyebo fya nkumbu ifilefuma ku fyalo fimbi. Balekabila ubulayo bwa cine cine kabili ubwingatwalilila ubwa kubafwa ukupwisha ulukaakala, no kubafwa ukutendeka ukwikala bwino.”

Bushe akabungwe ka United Nations ne fyalo fyabamo kuti fyapayanya “ubulayo bwa cine cine kabili ubwingatwalilila” ubukabilwa ku kufumyapo ulukaakala? Presidenti wa ku United States of America Bill Clinton asosele amashiwi yambwilwe muli iyi lipoti ya mu nyunshipepala wa Star ukuti: “Pa numa ya kwipayaulula konse uku ukwa muli uno mwanda wa myaka, twalishiba ukuti calyanguka nga nshi ukusosa ukuti ‘tacakacitike na kabili,’ lelo calikosa ukulenga cibe fyo.” Alundilepo ukuti: “Ukulaya ifingi kuti kwaba ukwabipa ngo kusakamana panono.”

Ukucila pa myaka 2,500 iyapitapo, kasesema Yeremia asosele pa lwa matukuto ya bantunse ukuti: “Mwe Yehova, ninjishibo kuti te kwa muntunse ukwenda kwakwe; te kwa muntu uuleya ukushikimika amatampulo yakwe.” (Yeremia 10:23) E ico, lyene, lisubilo nshi lyabako ilya kufumyapo ulukaakala?

Nge fyo tubelenga pali Esaya 60:18, Lesa alaile ukuti: “Takwakomfwike kabili ulufyengo mu calo cobe, nangu kupumpunta no kutobaula mu mipaka yobe.” Uko kusesema kwafishiwepo intanshi lintu Lesa abweseshe abantu bakwe abali bankole ku calo cabo. Kwalikwata no kufishiwapo kukalamba uko twingaipakisha. Yehova Lesa ‘talelaya ifingi.’ Apo e Wapulishamo kabili e Kabumba wa bantunse, e wingafumyapo “ulukaakala.” Ilyo Ubufumu bwa kwa Lesa bwakulateka, umutende ukanana. Ulukaakala lukaba nalufumishiwapo kuli pe na pe!—Daniele 2:44.