Imilimo Isuma Icindika Lesa

ABATEMWA Lesa balatulukusha ukusanikila ulubuuto lwa ku mupashi ulwaba mu Cebo cakwe, Baibolo. Muli iyi nshila, balomfwila ifunde lya kwa Yesu ilitila: “Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu.” (Mateo 5:16) Insoselo ne mibele isuma kuti fyacindika Lesa.

Inte sha kwa Yehova bafwaya ukuteemuna Lesa pa kukonka ifyo Baibolo ilanda no kwesha ukwafwa bambi lwa ku mupashi. Balacita ici na mu fyalo umo umulimo wabo uwa kushimikila taulasuminishiwa ne funde. Mu musumba wa bwangalishi uwa mu calo ca musango uyu cimo ifi, Inte shilabungana capamo cila mwaka ukusangwa impendwa ya bantu ukutendekela pali 6,000 ukufika kuli 9,000. Pa kutila babungane nge fi, balasonkela ifikuulwa ifikalamba ifya kulangishishamo ubukwebo. Nga fintu balecita mu myaka yapitapo, lintu ibungano lyabo ilya mu 1999 talilatendeka, Inte sha kwa Yehova ishingi balibombele nga nshi mu kuwamya icikuulwa no kubika ifisoselo ne mipando iingi nga nshi.

Uku ukupekanya kwalimwenwe. Abakalamba ba cilya cikuulwa balimwene icalecitika. Kabili balimwene ukuti nangu impendwa yalikuliile ukufika kuli 15,666, ifintu fyonse fyaendele bwino bwino kabili Inte balekonka amafunde. Balya ababomba muli cilya cikuulwa balitemenwe nga nshi ukumona ifyo Inte bawamishe icikuulwa pa numa ye bungano.

Abakalamba ba ici cikuulwa balitashishe nga nshi e co babikile Inte pa muulu wa mutande wa mashina ya basonkelako cilya cikuulwa pa kutila bakabe aba kubalilapo ukubomfya mu mwaka ukakonkapo. Lelo aba bakalamba bacitile ne fyacilapo. Pa July 15, 1999, bapeele komiti we bungano icilambu pa kulangisha ukutasha. Pa kapampa bapeelwe palembelwe amashiwi ayaleti “icilonganino ca Nte sha kwa Yehova”—icintu icishingenekelwa mu calo umo umulimo wabo uwa kusambilisha Baibolo wabindwa.

Ukushinguluke sonde lyonse mu mwaka wa 2,000 na 2,001, amamilioni ya bantu bakasangwako ku mabungano ya citungu ayengi ayaleti “Bakacita wa Cebo ca kwa Lesa” aya Nte sha kwa Yehova. Na imwe nga mwasangwako, mukaimwena ifyo abantu abafwaisha ukucita fintu Baibolo isosa babomba imilimo iicindika Lesa.