‘Balanda Pa Busuma No Kutemwa’

MU MYAKA ya nomba line, kwalima kampeni wabipisha mu France uwa kusuusha Inte sha kwa Yehova. Abalwani babo balibomfya ifyebo ifyabamo no bufi e lyo no kukopeka pa kuti bengababepesha ku cintubwingi. Ku kwamba kwa 1999, Inte sha kwa Yehova mu calo conse ica France bashalike amatrakiti amamilioni 12 ayali no mutwe waleti, People of France, You Are Being Deceived! (Mwe Bena France, Mulekopekwa!) Muli uyu trakiti, mwali ukulengulula amashiwi ya kubasuusha.

Tapapitile inshiku ishingi apo kampeni yapwilile, ba Jean Bonhomme, badokota kabili abali kale ba cilolo wa mu Ng’anda ya Mafunde, batumine kalata kuli bakalemba wa manyunshipepala pa kuti amashiwi yabo yengasabankanishiwa ku cintubwingi. Balembele ukutila: “Limo limo, Inte sha kwa Yehova balesa ku mwandi. Besa mu kulanda na ine pa lwa kuba umuntu umusuma kabili uwatemwa bonse . . . Tabapatikisha ukutandala. Bantu banakilila pa kulanda kabili balaba no mutembo lintu ndetelebwila pa fyo balenjeba.”

Ukulanda na pa fyo Inte sha kwa Yehova shimona ifintu fya ku mupashi, baBonhomme batile: “Bantu bashashintilila pa mano ya calo, bena, te kuti bakukalifye. Lelo, amano yaba muno calo ayo bapolitishani bamo bakwata yalatiinya umutende wa bekala calo no kwikatana kwaba pa kati ka bantu.”