Bushe Umutende wa Calo Conse Ukabako Shani?

BUSHE umutende wa calo conse ukesa nomba line? E fyo abengi baletontonkanya kale, lelo pali nomba balatwishika. Ukulingana na lipoti yalelanda pa lwa mafya ya nshita yesu iya ku ntanshi, iyasabankanishiwe mu nyunshipepala ya Daily Mail & Guardian, iya mu South Africa, “ukusobela kwacitilwe imyaka 10 iyapitapo, ukwa kuti kukaba ukwikatana kwa fyalo fyonse, nomba kumoneka ukuti takwakatale akucitika.”

Bakalemba balandile pa kusubila kwaliko imyaka fye 10 iyapitapo. Ukuumana kwa fyalo e lintu fye kwapwile, ne fyalo fyakwatisha amaka fyalilekele ukukansana. Ilyo camoneke kwati icintu icipya calatendeka ukucitika, abengi baenekele ukuti abantu bali no kutendeka ukutunguluka mu kupwisha ubupiina, amalwele, na mafya ya mu filengwa na Lesa. Lipoti yatila: “Uko kusobela nomba kumoneka fye nge fya kwelenganya ifishingacitika. Ukukansana na kabili kwalitendeka na mu ncende isho tushaishibe nangu panono; ubupiina mu calo conse nabutwalilila ukufula. Kuli ifyalo na fimbi fibili ifyakwata ifyanso fya manyukiliya. Imibombele ya ba United Nations nayo naibongololwa pa mulandu wa kukanayankulako bwino ku kulilishika kwa bantu ukwakonkana. Nomba imibele taili ya kwelenganya ifisuma lelo iletiinya.”

Abasambi ba Baibolo balishiba ukuti amatukuto ya muntu, nangu yengawama shani, te kuti yatunguluke ukufikapo. Mulandu nshi? Ni co, nga filya Baibolo isosa, “pano isonde ponse palaala mu maka ya Mubifi.” (1 Yohane 5:19) Isonde ililetungululwa na Satana te kuti lisanguke Paradise uo Lesa alipangile ukuti libe.

Nalyo line kuli icingalenga ukwenekelela umutende. Yehova Lesa alaya ukuleta umutende mu calo conse, te pa kuwamya fye imbali shimo shimo isha buno bwikashi, lelo ni pa kulete “calo cipya, umwaikalo bulungami.” (2 Petro 3:13) Ca cine, Ubufumu bwa kwa Lesa bukasangula icalo conse ukuba ubwikalo bwa mutende ne nsansa, umo ubumi ne ncito fikalaletela abantu ubuseko kuli pe na pe. Na kabili, Lesa alaya ukuti “akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” Ifi filayo tafyashimpwa pa filayo fishashininkishiwa ifya bantu. Lelo, fyashimpwa pa Cebo ca cine ica kwa Kabumba, uushibepa.—Ukusokolola 21:4; Tito 1:2.