Ukuyemba kwa mu Kati Kulabelelela

UMWINA KRISTU WA BUSUMINO UMUKOLOCI ATILE, “ABALUMENDO BATILA ICIYEMBO NE MIBELE ISUMA FIMO FINE.”

Ca cine, pa nshita ntali, umuntu alemenena mu kucishamo ukukatamika ukuyemba kwa ku nse icilenga ilingi ukukanamona imibele ya mu kati. Lelo, Kalenga wesu, alolesha pa buntu bwesu ubwa mu kati, te mulandu ne mimonekele yesu. E co, alitwimikila ica kumwenako cawamisha ica kupingula kwabamo ukukosoka. Ukulingana na Baibolo, Lesa umwine atile: “Pantu Yehova tamona ifyo umuntunse amona; pantu umuntunse amona pa menso, lelo Yehova amona mu mutima.”—1 Samwele 16:7.

Lesa e Ntulo ya kuyemba kwa cine cine ukwa muntu, kabili Icebo cakwe cisokolola ukuti pa kupimununa ubusuma bwa muntu, icacindama sana kumona imibele ya ku mupashi. Baibolo itila: “Iciyembo ca kulufya, no kuyemba mupu, lelo umwanakashi wa mucetekanya, wene akatashiwa.” (Amapinda 31:30) Cine cine, ubusuma bwa ku nse kuti bwafisa ububi bwa mu kati. (Estere 1:10-12; Amapinda 11:22) Nangu line ukuyemba kwa mubili kuti kwapwa mu kuya kwa nshita, ukuyemba kwa mu kati, nelyo imibele ya mutima, kuti yawaminako no kubelelela.

Fintu tulingile lyene ukulundulula imibele pamo ngo kutemwa, ukusekelela, umutende, ukutekanya, icongwe, ubusuma, icishinka, ukunakilila no kuteko mutima! (Abena Galatia 5:22, 23) Nga twacite fyo, ukuyemba kwesu ukwa mu kati kukabelelela.—1 Petro 3:3, 4.