Bushe Ukwikatana kwa Mipepele Nakupalama? — Watchtower LAIBRARE YA PA INTANETI

Bushe Ukwikatana kwa Mipepele Nakupalama?

Christian Krause, presidenti wa Lutheran World Federation atile: “Tuleimwena na menso ifyo tushabala atumona kale pa lwa macalici yesu.” Papa John Paul II na o wine alandile pa “nshita yaibela iya kubombo mulimo wayafya uwa kwikatanya bwino sana Abena Kristu.”

Icalengele balande aya mashiwi ya kucincimusha ni co kwali ukusaina Icikalata ca Cumfwano pa October 31, 1999, mu Augsburg, ku Germany, ukusuminisha ku fyaba mu lupapulo lwa Cisambilisho Casuminishiwa ica Kulekelelwa Amasambi. Balitontonkenyepo bwino pa kusala inshita ya kukumana ne cifulo ca kukumaninako. Batila pa October 31, 1517, Martin Luther akobeke ulupapulo lwakwe ulwalimo ifisambilisho 95 pa ciibi ce linga lye calici mu Wittenberg, uko kwine kwali e kutendeka kwa Bumwaluka bwa ba Protestanti. Na kuba ku Augsburg e ko abakonshi ba kwa Martin Luther mu 1530 batwele ulupapulo lwabo ulwa fisambilisho, ulwaleitwa Kalata wa Cumfwano uwa ku Augsburg, ulo ba Katolika bakeene, e calengele kube no kupusana kwabipisha pali ba Protestanti na Bakatolika.

Bushe kulya Kusuminishanya kukaba e ntendekelo ya cine cine iya kupwisha ukupusana kwa macalici nga filya abene balandile? Ibumba limo te fyo lyalemona. Bashimapepo ba Protestanti ukucila pali 250 bena balikeene, ukusoka abati tabafwile ukwingililwa na ba Katolika. Ba Protestanti na bo bene balifulilwe ilyo ba Katolika babilishe ukuti umwaka wa 2000 ukaba uwaibela ku kwelelwa amasambi, icintu cimo cine e calengele ukuti bapusane pa myaka 500 iyapita. Kabili apo fye Ukusuminishanya kwa ku Augsburg, Ukulandula kwa Bakatolika ilyo kwali Ukusuminishanya kwa ku Trent, fyonse ficili filekonkwa, ca kutali fye ukuti kukaba ukwikatana.

Ukupusana no kukangana kwaba mu Kristendomu te kuti kupwile mu kusaina fye icikalata ca cumfwano. Ukulundapo, ukwikatana mu fisambilisho kwashimpwa sana pa fisambilisho fya cine cine ukufuma mu Cebo ca kwa Lesa, Baibolo. (Abena Efese 4:3-6) Ukwikatana kwine kwine takwishila mu kusumina fye ukwa kuti cikulu kusumina. Kufuma ku kusambilila no kucita ico Lesa afwaya kuli ifwe. Kasesema wa citetekelo Mika atile: “Inko shonse sha bantu shendela ulo no lu mwi shina lya mulungu wa luko, lelo ifwe twakulaendela mwi shina lya kwa Yehova Lesa wesu umuyayaya umuyayaya.”—Mika 4:5.

[Abatusuminishe Ukubomfya Icikope pe bula 32]