“Yehova Musuma Nga Nshi Kuli Ine!”
PA CUNGULO cimo mu March 1985, abaume na banakashi aba mu Dipartimenti wa Kulemba pa maofeshi yakalamba aya Nte sha kwa Yehova mu New York, U.S.A., balitemenwe ukumona icintu cacindama. Karl F. Klein pali iyo nshita ninshi alibombele imyaka 60 mu butumikishi bwa nshita yonse. Munyinefwe Klein alandile no kucincimuka ati: “Yehova musuma nga nshi kuli ine!” Atile ilembo lya Amalumbo 37:4 e lyo atemenwe sana pa malembo ya mu Baibolo. Pa numa, asansamwishe bonse ilyo abulile icilimba cakwe ica cello no kutendeka ukulisha.
Pa myaka 15 iyakonkelepo, Munyinefwe Klein atwalilile ukubomba mu Dipartimenti wa Kulemba na mwi Bumba Litungulula ilya Nte sha kwa Yehova. Lyene, pa January 3, 2001, ilyo ali ne myaka 95, Karl Klein uwakwete isubilo lya kuya ku muulu alifwile uwa bucishinka.
Karl afyalilwe ku Germany. Abafyashi bakwe pamo na wene bakuukile ku Amerika, kulya e ko Karl ailekulila mu Chicago, Illinois. Ilyo aali umwaice Karl no mwaice wakwe Ted balitemenwe sana Baibolo. Karl abatishiwe mu 1918, kabili amalyashi ya kucincimusha ayo aumfwile pe bungano lya Basambi ba Baibolo mu 1922 yamulengele ukutemwa ubutumikishi bwa mwi bala ubo abomba imyaka yonse iya bumi bwakwe. Talefwaya umulungu ukupwa fye ukwabula ukubombako umulimo wa kushimikila, e fyo alecita nangu ni mu milungu ya kulekeleshako iya bumi bwakwe.
Karl atendeke ukubomba pa maofeshi yakalamba aya Nte sha kwa Yehova mu 1925. Pa kubala alebombela mu dipartimenti wa kupulinta. Alitemenwe sana inyimbo, kabili pa myaka iingi alelisha icilimba ca cello mwi bumba lya bakalisha wa filimba abalelisha pa mulabasa wa redio uwa Bena Kristu. Pa numa, abombele mu Dipartimenti wa Mulimo, kabili aipakishe ukubombela pamo na kangalila wa iyi dipartimenti, T. J. Sullivan. Mu kupita kwa nshita, Ted alyupile kabili aile mu mulimo wa bumishonari no mukashi wakwe Doris, ku Puerto Rico.
Pa myaka 50, Karl Klein abombele mu Dipartimenti wa Kulemba, umo abombeshe pantu alitemenwe ukusapika kabili alishibe bwino Baibolo. Mu 1963, Karl aupile Margareta, mishonari umwina Germany uwalebombela ku Bolivia. Pa kutungililwa bwino no mukashi wakwe, maka maka ilyo alelwala, camulengele ukutwala ifisabo na mu mushinku wa bukote uyo abengi balekelapo ukubomba. Ubufumacumi bwa kwa Karl ukubikapo ne fyo atemenwe inyimbo, kwalengele ukuti abengi baleibukisha amalyashi alelanda pa cilonganino na pa mabungano. Ilyo fye ashilafwa, atungulwile ukulanshanya kwe lembo ukwa lucelo ku ba mu lupwa lwa kulisha ulwa pa Bethel ku New York, ukwalengele bonse abalipo ukumwenamo no kusansamuka.
Bakabelenga abengi aba Ulupungu lwa kwa Kalinda kuti baibukisha ilyashi lya bumi bwa kwa Munyinefwe Klein, ilyashi lya fyo apitilemo ilyalembelwe mu Ulupungu lwa kwa Kalinda ulwa October 1, 1984. Mukaipakisha ukulibelenga nelyo ukulibelengamo na kabili, ukwishiba ukuti umwine uwalembele ili lyashi aikele imyaka na imbi 15 ninshi acili Umwina Kristu wa cishinka kabili uwaipelesha.
Ifi aali umo uwa basubwa ba kwa Shikulu, Munyinefwe Klein afwaishe no mutima wakwe onse ukuteka na Kristu mu muulu. Tatuletwishika ukuti Yehova nomba nafikilisha ico alefwaya.—Luka 22:28-30.
[Icikope pe bula 31]
Karl mu 1943 ali na T. J. Sullivan, Ted na Doris
[Icikope pe bula 31]
Karl na Margareta, mu October 2000