Kalata wa Kubatashishapo pa Mibele Isuma

KALATA wa Kutasha pa Mibele isuma e cilambu Akabungwe ka Association of Congolese and African Journalists for the Development (AJOCAD) mu calo ca Democratic Republic of Congo kapeela “abantu nangu amateyanyo ayaileyafwilishako ukuwamya ubwikashi [mu Congo].”

Pa November 17, 2000, Kalata wa Kutasha pa Mibele Isuma apeelwe ku Nte sha kwa Yehova pa “fyo bafwilisha umwina Congo umo umo ukulunduluka ukupitila mu masomo na mu masambililo ya mu mpapulo shabo.”

Ukulanda pali ici cilambu bapeelwe, inyunshipepala ya mu Kinshasa iya Le Phare yatile: “Kuti mwafilwo kusanga umwina Congo uushapokako bamagazini ba Ulupungu lwa kwa Kalinda atemwa Loleni! nangu impapulo shimbi ishasabankanishiwa ne Nte sha kwa Yehova. Aba bamagazini balanda pali fyonse ifyaba mu mikalile.” Kabili icipande calandile ukuti impapulo shilanda pa “fya kupwisha impika sha lelo” no “kulondolola ifyo ifilecitika ndakai filepilibula.” Magazini afuma uwa Loleni! umo umo “takanamo mu mapolitiki kabili talumbilisha uluko lumo ukuti lwalicila ulunankwe.” Kabili, alafwilisha “ukucetekela mu malayo ya kwa Kabumba aya calo cipya ica mutende no mutelelwe icili mupepi no kupyana pa bwikashi bwa ndakai ububifi, ubwa bupulumushi.”

Nga fintu ukuteyanya kwa AJOCAD kwalandilepo, impapulo sha Nte sha kwa Yehova shalinonsha abena Congo abengi. Ubu bukombe bwe subilo ubusangwa mu ndimi ishingi na imwe kuti bwamunonsha.

Shi belengeni ifyebo ifili pe samba ukumona fintu na imwe mwinganonkelamo.