Bushe Satana E ko Aba?
Icitabo ca “All in the Mind—a Farewell to God” icalembelwe na Ludovic Kennedy citila: “Kwali inshita mu fya mapepo Abena Kristu basumine ukuti Kaseebanya, Beelsebuli nelyo Satana, imfumu ya bubifi, ali muntu wa cine cine kabili uwa maka kwati ni fintu ku banono Lesa pali lelo acili uwa cine cine kabili uwa maka; abaYuda na Bena Kristu ebapangile kaseebanya uwali mu buntu na mu bunama pa kuti balondolole icilenga ububifi ubwaba mpanga yonse. Pa numa Abena Kristu batile wa kwelenganya fye uushabalile abako kabili mu bumfisolo balimupoosele.”
LUDOVIC Kennedy, kasabankanya wa malyashi kabili kalemba atila, pa myanda ya myaka iingi tapaba nangu umo mu Kristendomu uwatwishika ukuti Kaseebanya e ko aba. Mu citabo cakwe ica Europe’s Inner Demons profesa Norman Cohn atila, Abena Kristu, limo “baleobelwa ku maka ya kwa Satana ne fibanda fyakwe.” Te bashasambilila fye baleobelwa. Ku ca kumwenako, Profesa Cohn atila: icisambilisho ca kuti Kaseebanya afwele fye umubili wa bunama no kuba kateka pa bubifi no kusefya kwa ntambi ukwabipa, “tacafuma fye mu nshimi sha bashasambilila, lelo, e fyo aba mano ba muno calo basumina. Ili “bumba lya ba mano”—ukusanshako na bashimapepo basambilila—ebalengele kulya kufwaya no kwipaya indoshi ukwaliko mu Bulaya monse pa kati ka myaka ya ba 1450 ukufika ku 1700. Casoswa ukuti abe calici na balashi ba buteko balungulwishe no kwipaya abantu mupepi na 50,000 abo baletunganya ukuti bali ni ndoshi.
Te ca kupapa ukuti, abengi balakaana filya batila abatiina Kaseebanya batiina icintu ca kwelenganya fye. Nangu fye ni kale mu 1726, Daniel Defoe asuushishe abasumine ukuti Kaseebanya ali cinama ica kutiinya “icakwata amapindo ya kasuusu, amasengo, amabondo, umucila uutali, ululimi lwa mutunkulo, na fimbi fye.” Atile imfundo sha musango yo “tashalimo mano kabili shali fye sha kwelenganya ishishacindama” ishatuntwike ku “baletungilila no kupanga icipasho ca kwa kaseebanya uwalemoneka nge cinama ca kutiinya ica kuipangila ico balebepa abashaishibe ukuti e kaseebanya.”
Bushe na imwe e fyo mutontonkanya? Bushe na imwe mulesumina ukuti “kaseebanya apangilwe fye na bantu pa kwesha ukulondolola ico babembukila”? Aya mashiwi yalasangwa mu lupapulo lwa The Zondervan Pictorial Encyclopedia of the Bible, kabili abengi abaitunga ukuba Abena Kristu e fyo batontonkanya. Jeffrey Burton Russel atila, abasoma ifya mipepele mu Kristendomu abengi batila Kaseebanya ne fibanda bakwelenganya fye.”
Lelo, kuli bambi, Kaseebanya e ko aba icine cine. Batila kufwile kwalibako amaka ya bubifi aya cibumbwa ca mupashi ayalenga ububifi bucitika cila nshita ubwatebelela umuntunse ukutula fye kale. Russel atila, “Utuyofi twacitwa mu mwanda wa myaka uwalenga 20,” mulandu umo uo abalesumina ukuti Kaseebanya e ko aba balefulilako pa numa ya kuti pa nshita ntali baleti tabako.” Mu citabo ca Religious Superstition Through the Ages, kalemba Don Lewis atila, abasambilila abengi, “abaleseka ifikolwe fyabo ifishasambilila ifyasumine ukuti imipashi e ko yaba, na bo balitendeka ukumona ububifi muli iyi mipashi.”
Lelo ni cili kwi icishinka? Bushe Kaseebanya wa kwelenganya fye? Nelyo bushe tufwile ukumumona ukuti muntu wa cine muli uno mwanda wa myaka uwalenga 21?
[Icikope pe bula 4]
Ukulingana ne fi fyalengele Gustave Doré, mu nshimi sha kwelenganya isha kale, baleti Kaseebanya amoneka kwati muntu kabili kwati ni nama
[Abatusuminishe]
The Judecca—Lucifer/The Doré Illustrations For Dante’s Divine Comedy/Dover Publications Inc.